Sýret: gov.kz
Bul joba Amerıkanyń Qazaqstandaǵy dıplomatııalyq mıssııasynyń jáne túlekterdi tartý jónindegi «Alumni engagement innovation fund» ınnovasııalyq qorynyń qarjylyq qoldaýymen júzege asyp otyr. Joba aıasynda elimizdegi kásipkerlik ekojúıesi qarqyndy damyp otyrǵan óńirler tájirıbesi jáne ózge aımaqtardaǵy áıelder bıznesin jetildirýge baılanysty zertteýlermen birge elimizdegi bıznes qoǵamdastyqtyń múmkindigi men jelilik baılanystardy keńeıtý basshylyqqa alyndy.
Sarapshylar joba sheńberinde áleýmettik jáne ekonomıkalyq mártebesine qaramastan, barlyq áıelge teń múmkindikti qarastyra otyryp, ınklıýzıvti baǵyttardy damytýǵa nazar aýdardy. Endigi kezekte resýrstarǵa qoljetimdilik, trenıngter men tálimgerlik baǵyttaǵy qadamdar áıelder bıznesin damytyp, kedergilerdi joıýǵa yqpal etpek. Bul baǵytta mamandar, ásirese Soltústik Qazaqstan, Batys Qazaqstan jáne Pavlodar sııaqty qazirgi kezde áıelder kásipkerligi tómen aımaqtarǵa erekshe nazar aýdardy.
Q.Saǵadıev atyndaǵy halyqaralyq bıznes ýnıversıtetiniń ǵylymı zertteýlerdi basqarý kafedrasynyń meńgerýshisi Janat Júsipovanyń aıtýynsha, áıelder kásipkerligin damytý kez kelgen eldiń ekonomıkalyq áleýetin júzege asyrýda mańyzdy rólge ıe. Bul jumys oryndaryn ashýǵa jáne ekonomıkany yntalandyrýǵa kómektesedi. «Eger áıelderdiń ekonomıkaǵa qatysýy erlermen teń deıtin bolsaq, «McKinsey Global Institute» esebine sáıkes 2025 jylǵa qaraı jyl saıynǵy álemdik IJО́-niń 28 trıllıon dollarǵa ósýi múmkin. Biraq elimizde áıelderdiń bızneske qatysý deńgeıi tómendeıtin bolsa, onyń saldarynan ekonomıka mıllıardtaǵan teńgege zardap shegip, turǵyndardyń ómir súrý deńgeıi jáne adamı kapıtal báseńdeýi múmkin. 2022 jylǵy statıstıkalyq málimetterdi nazarǵa alatyn bolsaq, elimizdegi áıel kásipkerligi óńirlerde joǵary bolǵan. Endigi kezekte osy úsh aımaqtaǵy belsendilikti arttyrýǵa kóńil bólinedi», dedi sarapshy.
Joba aıasynda tórt kezeń boıynsha 50 qatysýshy irikteldi. Osyǵan oraı bıznes-ınkýbatorlar ókilderi joǵary bilikti tálimgerlerdiń jetekshiligimen óz bıznes-jobalaryn usyndy. «Efes Qazaqstan» kompanııasynyń marketıng jónindegi dırektory Zeınep Erkan Alp, Soltústik Qazaqstan oblysy О́ńirlik kásipkerler palatasy janyndaǵy Soltústik Qazaqstan oblysy áıelder kásipkerligin damytý ortalyǵynyń menedjer-keńesshisi Irına Vasıleva, UIB ǵylym jónindegi prorektory Quralaı Nurǵalıeva sııaqty bilikti mentorlar kásipkerlerge kásipkerlikti damytý men kedergilerdi joıýǵa baılanysty trenıngter ótkizip, nátıjesinde «Demo Day» alańynda bıznes qaýymdastyq ókilderi 10 úzdik jumysty tańdap aldy. Osy oraıda úzdikter anyqtalyp, birinshi oryndy Aınara Kóbeevanyń «Festıvaldar, tımbıldıngter men is-sharalardy kiltpen uıymdastyrý» jobasy – mentory Ekaterına Novoselova, ekinshi oryndy Mılana Imanǵalıevanyń «Sana» azaq tilinde sóıleıtinderge arnalǵan aǵylshyn tilin oqytý boıynsha onlaın mektebi» jobasy – mentory Qamshat Álibekova, úshinshi orynǵa Margarıta Bekeshevanyń atpen serýendeý qyzmetiniń «At sporty klýby» jobasy ıe boldy – mentory Maııa Súıinshalıeva.
Osy jobaǵa Petropavl qalasynan qatysqan Aleksandra Ilına kóptegen paıdaly resýrsqa qol jetkizgenin atap ótti. Onyń aıtýynsha, baǵdarlama aıasynda bıznesti bastaý men damytý úshin kásibı mamandarmen kezdesip, keńes alýǵa múmkindik týdy. Ásirese marketıng jáne qarjy menedjmentine qatysty sabaqtardyń paıdasy zor boldy. Onyń barysynda ıdeıalardy júıeleýge jáne kásipkerlik strategııasyn jetildirýge múmkindik týdy. Áıelder startapyn damytý jobasy kásipkerlikti damytýda jaı ǵana oqý baǵdarlamasy emes, qazirgi syn-tegeýrinder kezeńinde ekonomıkaǵa qajetti ınklıýzıvti baǵyttardy iske asyrýǵa berilgen múmkindik sanalady.
ALMATY
