О́ńirimizde sırek kezdesetin etikshilik isin ol «Aýyl amanaty» jobasy aıasynda qolǵa aldy. Baǵdarlama arqyly 7 mln 300 myń teńge nesıe rásimdep, etik tigýge qajetti tigin mashınalaryn, ózge de qural-jabdyqtaryn satyp alyp, túrli ólshemdegi aıaqkıim qalyptaryn jasatty. Jeke turǵyn úıiniń janyndaǵy etik tigý sheberhanasynda qazir úsh adam jumys isteıdi. Sehtyń zamanaýı tigin mashınalarymen aıyna 200 syńar qysqy etik daıyndaýǵa múmkindigi bar.
«Etikshilik ata-babamyzdan mıras bolǵan kásiptiń bir túri. О́nimiń sapaly bolsa jerde qalmaıdy. Ázirge eresekterdiń qysqy etikterin tigemiz. Onyń ishinde túrli ólshemdegi qonyshty aıaqkıimmen qatar túzdegi sharýashylyqqa arnalǵan saptama etikter bar. Paıdalanylatyn bylǵarynyń barlyǵy ońtústik óńirlerdegi sehtarda mal terisinen óńdep jasalǵan. Qajetti shıkizattyń alǵashqy toptamasyn Shymkent, Almaty, Taraz qalalarynan, tabanyna qoldanylatyn materıaldy Reseı elinen tapsyryspen aldyrttyq. Bizdiń qolymyzdan shyqqan etikter qysta jyly ári tolyǵymen tabıǵı ónimnen jasalǵan dep nyq senimmen aıta alamyz», deıdi kásip ıesi.
«De shoes» dep atalatyn aıaqkıim jasaý sehynyń alǵa qoıǵan birneshe jospary bar. Sonyń biri – balalar aıaqkıimin kóbirek jasaý jáne ony tutynýshyǵa qolaıly baǵada usyný. Qazir munda daıyndalǵan captama etiktiń baǵasy – 20 myń, qonyshty aıaqkıimder 30 myń teńgeniń shamasyna baǵalanyp otyr. Tyń kásipke den qoıǵan Erbolattyń bul iste aqylshysy jáne sheberhana jumysyn úılestirýshisi – etik sheberi Dosbol Ábdibaev esimdi azamat. Kásip ıesine aǵaıyn bolyp keletin Dosboldyń teri óńdeý jumysynan bastap, aıaqkıim tigý isinde jınaqtaǵan tájirıbıesi 20 jyldan asady.
«Janymyzda Qytaı sııaqty alyp memleket turǵanda jazǵy aıaqkıim tigip bástesýimiz ázirge qıyndaý. Biraq olar da osyndaı shaǵyn sehtarda óndirilgen ónimderimen álem naryǵyna shyǵyp otyr. Bul jerde táýekel men qoldaý kerek dep esepteımin. Sapaly bolsa, qysqy aıaqkıimge suranys bolady. Elimizde mal terisi tegin bolǵanymen, bylǵary materıaly tym qymbat. Oǵan sebep – teri óńdeý sharýashylyǵynyń kenjelep turǵany. Osyny ár óńirde jandandyratyn ýaqyt keldi», deıdi Dosbol.
Resmı derekterge súıensek, memleketimizde aıaqkıim óndiretin 70 shaqty shaǵyn jáne orta kásiporyn bar. Alaıda olar ishki naryqtyń 5 paıyzyn ǵana qamtamasyz ete alady. Saýdalanatyn aıaqkıimniń 95 paıyzy – ımporttyq ónimder.
Otbasylyq kásip retinde bastalǵan Erbolat Maratulynyń etik tigý sehy otandyq aıaqkıim óndirisine tamshydaı bolsa da óz úlesin qosaryna senemiz.
Muhtar MYRZALIN
Aqtóbe oblysy,
Shalqar qalasy
