Bul oqý-jattyǵý alǵash ret keshendi sabaqtarmen birge ekijaqty formatta ótkizildi. Is-sharalar áskerı basqarý organdarynyń úılesimdiligin jetildirýge, áskerlerdiń dalalyq daǵdylaryn arttyrýǵa jáne shtabtar men komandırlerdiń áskerdi udaıy basqarýdaǵy praktıkalyq daǵdylaryn damytýǵa baǵyttalǵan. Oǵan «Shyǵys», «Ońtústik» óńirlik qolbasshylyqtarynyń bólimsheleri jáne Qarýly kúshter Qurlyq áskerlerine tikeleı baǵynatyn áskerı bólimder tartyldy.
– Ahýaldyń qubylmaly jaǵdaıynda artıllerııa, avıasııa, ÁShQQ jáne radıoelektrondyq kúres quraldarynyń kómegimen túrli ásker tegi men áskerlerdiń ózara is-qımyl máseleleri sapaly pysyqtaldy. Atysty retteý, jergilikti manevrler jáne pozısııalardy jyldam ózgertý joǵary deńgeıde oryndaldy. Árbir áskerı qyzmetshi barynsha áskerı tártipke saı, jedel jáne qıyn jaǵdaıda mindetterdi oryndaýǵa daıyn ekenin kórsetti, – dedi Bas shtab bastyǵy – Qarýly kúshteri Qurlyq áskerleri bas qolbasshysynyń birinshi orynbasary general-maıor Mereke Kóshekbaev.
Oqý-jattyǵýǵa barlyǵy 3 myńnan asa áskerı qyzmetshi jáne 800-den asa qarý-jaraq pen áskerı tehnıka jumyldyryldy. Oqý-jattyǵýdyń dittegen maqsattaryna qol jetkizildi. Jeke quram daıyndyq deńgeıiniń joǵary ekenin kórsetti.
