Osymen ekinshi márte shymyldyǵyn túrgen tanymdyq lager bıyl halyqaralyq mártebe alyp otyr. El aımaqtarynan, sondaı-aq О́zbekstan, Qyrǵyzstan, Tájikstan, Túrikmenstan sekildi baýyrlas memleketterden kelgen júzdegen jas úsh kún qatarynan Almaty irgesindegi «Arman dala» lagerinde bas qosyp, ýaqytyn tıimdi ótkizdi. Joba aıasynda qatysýshylar ár salada jetistikke jetken tabysty adamdarmen pikir almasyp, baǵdarlama qonaqtary kásibı tájirıbelerimen bólisti.
Is-shara qonaqtarynyń qatarynda Almatydaǵy IýNESKO aımaqtyq keńsesiniń dırektory jáne Qazaqstan, Qyrǵyzstan, Tájikstan men Túrikmenstandaǵy IýNESKO ókili Ámir Pırıch, Sıdneı Olımpıadasynyń chempıony Olga Shıshıgına, Parıj Olımpıadasynyń qola júldegerleri Aleksandra Le jáne Nazym Qyzaıbaı, «Qazaq tili» halyqaralyq qoǵamynyń Prezıdenti Raýan Kenjehanuly, telejúrgizýshi Amınata Ýedraogo, kásipker Beıbit Álibekov qatarly tanymal adamdar bar.
Jobanyń resmı ashylý saltanatyn ashqan Qazaqstan halqy Assambleıasy tóraǵasynyń orynbasary – Prezıdenti Ákimshiligi QHA hatshylyǵynyń meńgerýshisi Marat Ázilhanov jastarǵa tabys tilep, Prezıdent kómekshisi Rýslan Jeldibaıdyń halyqaralyq jastar lageriniń qonaqtaryna joldaǵan quttyqtaý hatyn oqyp berdi. Erkin pikir almasý formatynda ótken kezdesýde qurylym jetekshisi qatysýshylardy úzdiksiz izdenisterin toqtatpaýǵa shaqyryp, «Assambleıa jastary» tarapynan kóptegen aýqymdy is atqarylyp jatqanyn atap ótti.
«Adamdy shyrqaý bıikke jeteleıtin – bilim men eńbek. Osy jerge kelgen kópshiligińiz – birqatar tabysqa, jetistikke jetken azamatsyzdar. Jastar bastamalaryn damytý, jastar ortasynda qoǵamdyq kelisim men ulttyq biregeılikti nyǵaıtýda sizderge úlken jaýapkershilik júkteledi. Otanǵa degen súıispenshilikti, halyq birligin bekemdeýdi, Qazaqstan halyqtaryna ortaq qurmetpen qaraýdyń úlgisin nasıhattap kelesizder. Qazir eńbek etem, bilim alam degen adamǵa jol ashyq. Osy múmkindikterdi utymdy paıdalanyp, tek elimizde ǵana emes, Orta Azııa elderiniń jastarymen ortaq ıdeıalar aıasynda yntymaqtasyp, elimizdiń bedelin bıiktetesizder dep senemin», dedi M.Ázilhanov.
«Assambleıa jastary» RQB tóraǵasy Tımýr Djýmýrbaev, jastardy áleýmettik qoldaý, memlekettik tildi etnosaralyq til mártebesinde damytý, qorshaǵan ortany qorǵaý men áskerı patrıottyq mádenıetti ilgeriletý birlestik alǵa qoıyp otyrǵan negizgi mindetterge kiretinin málimdedi.
«Búgingi is-sharaǵa kelgen jastardyń deni – el aımaqtaryndaǵy jastar birlestikteriniń jetekshileri men belsendi azamattar. Sondaı-aq qatarymyzǵa bıyl kórshi elderden delegat jastar kelip otyr. Biz olarǵa elimizdiń tarıhyn, baı mádenıetin, jastarymyzdyń yntymaq-birligin pash etemiz. Búginde «Assambleıa jastary» qanatynda 9 myńnan asa jas kóshbasshy bar. Olar – kúndelikti qoǵamdyq jumystarǵa atsalysyp, el birligin nyǵaıtýǵa úles qosyp júrgen memleketshil jandar. Belsendilerimiz memlekettik qyzmet qurylymdarynda, memlekettik ınstıtýttarda, ǵylym, mádenıet, ekonomıka, bıznes, sport sekildi barlyq jetekshi salada boı kórsetip júr. Dástúrli lagerdiń maqsaty – óńirdegi jastar problemasyna, olardyń talap-tilekterine qulaq asý ári bir maqsatqa jumyldyrý. Bizge ortaq alań usynyp, is-sharanyń ásem Almatyda ótýine muryndyq bolǵan Almaty qalasynyń ákimdigine alǵys bildiremiz», deıdi T.Djýmýrbaev.
Almaty qalasy qoǵamdyq damý basqarmasynyń basshysy Aıdar Esenbekov Almaty el jastarynyń eń kóp shoǵyry ornalasqan megapolıs ekenin, shaharda jastar sanatyndaǵy 700 myńnan asa azamat eńbek etip, bilim alatynyn, bıyldyń ózinde qalada jastardy qoldaýǵa arnalǵan 8 komıýnıtı ortalyq esik ashqanyn atady.
Almatydaǵy IýNESKO aımaqtyq keńsesiniń dırektory Ámir Pırıch mádenıetaralyq dıalogti damytýda jastarǵa úlken senim artylatynyn aıtyp, Ortalyq Azııa elderi jastarynyń mádenı yntymaqtastyq ornatýy bedeldi uıymnyń ǵylymı jáne áleýmettik jobalaryna qoljetimdilik týdyrýǵa serpin beretinin jetkizdi.
Joba qatysýshylary is-shara aıasynda ótken sheberlik dárister men motıvasııalyq kezdesýler ózderine shabyt syılaǵanyn aıtady. Uıymdastyrýshylar aldaǵy ýaqytta dástúrli jobanyń aýqymyn keńeıtýdi kózdep otyr.
ALMATY
