Altynkól – Qorǵas ótkeli Qazaqstannyń reıtıngin kóterdi

Qazaqstan men Qytaı shekarasyndaǵy jańa Altynkól – Qorǵas temirjol ótkeliniń ashylýy Qazaqstannyń «DoingBusiness» Álemdik banki («Bıznesti júrgizýdiń jeńildigi») reıtıngindegi 2015 jylǵy jaǵdaıyna oń áser etti. Bul jóninde Almatyda ótken Eýrazııa bıznes-forýmynda ÁB «DoingBusiness» tobynyń («Bıznesti júrgizý-2015»)  baıandamashysy Irına Beloserkovskaıa habarlady. – «Bıznesti júrgizý-2015» baıandamasynda biz 2013 jyldyń maýsymy men 2014 jyldyń maýsymy ishinde 20 fýttyq konteınerlerdiń Qytaı – Almaty aralyǵyndaǵy tranzıttik ýaqytyn qysqartqan «halyqaralyq saýda» kórsetkishindegi reformany atap óttik. Buǵan jańa Qorǵas ótkizý núktesiniń ashylýy arqasynda qol jetip otyr. Qazaqstan «halyqaralyq saýda» kórsetkishinde 186-orynnan 185-orynǵa kóterildi, – dedi ol esep berý barysynda. Álemdik banktiń ókili «halyqaralyq saýda» kórsetkishin anyqtaǵanda sarapshylar eksport pen ımport úderisine áser etetin  ártúrli quramdy bólikterdi, onyń ishinde qujattardy daıyndaýdy, kedendik resimdeýdi, tasymaldaýdy jáne porttaǵy operasııalardy  (júk teńizben de tasymaldanýy múmkin) nazarǵa alady dedi. – Qazaqstan jaǵdaıynda Almatydan Qytaıdyń Lıanıýngan,Chındao porttaryna deıingi marshrýt qarastyryldy.  Ortalyq Azııa boıynsha suralǵan respondentter jańa Altynkól – Qorǵas temirjol ótkeliniń ashylýyn oń baǵalap, osyǵan baılanysty eksport pen ımporttyń óskenin atap ótti. Bul ótkel konteınerlerdi ózine tartý arqyly Dostyq – Alashańqaı marshrýtyn jeńildetip qana qoımaı júk tasymaldaý ýaqytyn da qysqartyp otyr. Naqtyraq aıtqanda eksport boıynsha da, ımport boıyn­sha da tasymaldaý ýaqyty eki kúnge azaıdy, – dedi Beloserkovskaıa. Qorǵasty Álemdik Bank toby halyqaralyq tranzıt úshin Ortalyq Azııadaǵy  mańyzdy joba dep esepteıdi. «Egemen-aqparat».