Foto: Aqorda
«Áskerı turǵyda Reseıdiń jeńilmeıtini anyq. Soǵys budan ári órshı berse, barsha adamzatqa, eń aldymen, Reseı-Ýkraına qaqtyǵysyna tikeleı qatysy bar memleketterge saldary óte aýyr tıedi. О́kinishke qaraı, Ystanbul kelisimin bekitýden bas tartyp, tatýlasýǵa qol jetkizetin ońtaıly múmkindikti ýystan shyǵaryp aldy», dedi Qasym-Jomart Toqaev.
Memleket basshysynyń aıtýynsha, beıbitshilikke qol jetkizý múmkindigi áli de bar.
«Degenmen beıbitshilik ornatýǵa áli de múmkindik bar. Túrli memleketterdiń barlyq beıbit bastamalaryn muqııat qarap, áskerı is-qımyldardy toqtatý týraly kelisimge kelý kerek. Sodan keıin terrıtorııalyq máselelerdi talqylaǵan jón. Bizdińshe, Qytaı men Brazılııanyń beıbitshilik jospary qoldaýǵa turarlyq. Memleketter basshylary keledi, ketedi. Al halyq, ásirese kórshiles halyqtar beıbit ári bir-birimen túsinisip ómir súrýi kerek. Qazaqstannyń Reseımen dúnıe júzi boıynsha qurlyqtaǵy eń uzyn shegendelgen shekarasy bar. Bizdiń elderimiz arasyndaǵy yntymaqtastyq strategııalyq seriktestik pen odaqtastyq aıasynda damyp keledi. Qazaqstandyqtar ýkraın halqy men onyń tól mádenıetine shynaıy qurmetpen qaraıdy. Qazaqstan men Ýkraına arasynda eshqandaı kelispeýshilik bolǵan emes. Kıevte Elshiligimiz áli de jumys istep jatyr», dedi Prezıdent.
Eske sala keteıik, 16 qyrkúıekte Germanııa Federaldy Kansleri Olaf Shols Qazaqstanǵa resmı saparmen keldi. Memleket basshysy Qasym-Jomart Toqaev Olaf Sholspen shaǵyn jáne keńeıtilgen quramda kelissóz júrgizdi.
