Eldosqa elikteý

– Áke, aǵaı klýbty tazartyp jatyr, – dedi ol birde shaı ústinde sheshile sóılep.

– Tazartqany nesi?

– Jattyǵýǵa júrdim-bardym qaraıtyn tártibi nashar balalar klýbpen qoshtasady.

– Álsizderden qutylaıyn degen ǵoı...

– Myqtylardy da aıap jatqan joq, – dep bapkerdiń «qyryna» ilikken Astanadaǵy beldi jarysty bes ret utqan bir balanyń esimin atady.

– Nege óıtti eken?

– Eldos Smetov Olımpıada chempıony bolǵaly dzıýdoǵa qatysqysy keletin balalar kó­beıdi ǵoı. Aǵaı tártibi jaqsy uldardy qaldyryp, bosaǵan oryndarǵa irikteýden ótkender ǵana qabyldanatynyn aıtty.

Rasynda da, Parıj Olım­pıadasy, ondaǵy er Eldos Smetovtiń chempıon atanýy biraz balanyń armanyna qanat baılady. Ázızdiń de dzıýdoǵa degen qyzyǵýshylyǵy men qulshynysynyń áý bastaǵydaı emes arta túskenin ańǵaryp júrmiz. Buryn teledıdardaǵy, ınternettegi qoljetimdi dzıýdo jarystaryn aıtýymyzben ǵana qaraıtyn ol, qazir ár salmaqtaǵy dzıýdoshylardyń esimin jeti atasyn aıtqandaı jatqa soǵady. Oıatqyshtan buryn oıanyp, «taksı shaqyryp berińder» dep tyqaqtaıtyndy shyǵardy. Sóıtsek, Eldostyń arqasynda alaqandaı «Alaqaıdyń» ózinde básekelestik kúsheıe túsken. Klýb­taǵy balalar ornynan aıy­rylyp qalmaýǵa baryn salyp júr.

Qýanyshtysy, qazir barlyq jerdegi jaǵdaı – osyndaı. El­dos Smetovtiń jeńisinen keıingi dzıýdo dúmpýi bolashaq chem­pıondarǵa osylaı áser etip jatyr. Uzaǵynan bolǵaı. Kásibı sportshy atanar ıa atanbas, másele onda emes. Mańyzdysy – oqýshy balalardyń Eldostaı bolamyn degen umtylysynda. Muny endigi jerde Eldosqa elikteý degenimiz durys shyǵar, sirá.

Farhat Qaıratuly,

jýrnalıst