Kollajdy jasaǵan – Qonysbaı ShEJIMBAI, «EQ»
Zymyrandaı zýlaǵan ýaqyttyń kóshin keri qaıtaratyn, balalyq shaqqa sapar shektiretin qaırat eshkimde joq. Syrty totydaı taranyp tursa da, túrli mýzykalyq tásilmen syrlap árlese de, mátininen mán ketken ánder kóńildiń qoshyn keltire almaıtyny anyq. Sodan da bolar, alysta qalǵan arman jyldarǵa sapar shegip, sol kezdiń óshpes týyndylarymen janyńdy emdegendeı kúı keshesiń.
Iá, 2005–2006 jyldary qazaq estradasynda kishigirim «tóńkeris» jasaǵan jigitter az bolǵan joq. «Azııa» sekildi ózge de birneshe top shyrqaǵan ánder áli kúnge sanadan da, júrekten de óshpegen syńaıly. О́ıtkeni olar qudiretti ónerge degen adaldyqtyń antynan taıǵan emes. Tereńine tarta túsetin tamasha shyǵarmalardy saǵynatyndar áli de az emes-aý. Ony avtokólik júrgizýshileriniń talǵamynan da baıqap júrmiz. Búgin de taksıde otyryp, eski ánderdiń birin tyńdap, jaýraǵan janymyzdy jylytqandaı boldyq.
«О́zińmen qalsam kezigip,
Ǵajaıyp bir kúı týatyn.
Ekeýmiz ǵana sezinip,
Ekeýmiz ǵana uǵatyn»,
dep bastalatyn lırıkalyq án kóńil qatparyndaǵy beımálim sezim alaýyn tutatyp jibergendeı boldy. Ánniń bastalýynan da, qaıyrmasynan da romantıkalyq saryn esip tur. Bireýge az, bireýge kóp shyǵar... Ol jaǵyn kim bilsin? 18-20 jyl buryn hıtke aınalǵan shyǵarma bizdiń zamandastarǵa úshin dıdaryna daq túspeıtin mahabattyń gımnindeı bolǵan edi. Sózi men sazy úılesim tapqan án rasynda da oıyńdy onǵa bólip, kóńil túkpirindegi qupııa sandyqtyń qulpyn ashyp jiberetindeı qudiretke ıe me dersiń. Ádemi áýenge tartymdy sóz jazǵan aqynnyń sheberligi de baıqalady.
Shalqyǵan kóńilmen ǵalamtordy ashtyq, pernetaqtany bastyq. Esti ánniń sózi kókeıimizde saırap tursa da, mátin avtory kim ekenine osy kúnge deıin nazar aýdarmappyz. Endi bildik. Tamasha týyndynyń sózin belgili aqyn Baıanǵalı Álimjan jazǵan eken. Qysqasy, túsingendeı boldyq. Súıegine sóz qonǵan adam jazǵan soń shyǵar, «Ǵajaıyp kúı» áni áli kúnge deıin janymyzǵa ǵajaıyp jylý syılap turǵany.
Áýendi jazǵan aıtýly aqyn Baıanǵalı Álimjanovtyń uly –Nurlan Álimjanov. Akterligi men ánshiliginen kompozıtorlyǵy da kem túspeıtinin baıqadyq. Osylaısha, kezdeısoq izdenis arqyly ǵalamat ánniń áke men ul arasyndaǵy shyǵarmashylyq tandem nátıjesi ekenin bildik. Sodan da bolar, bul shyǵarma naǵyz retroǵa aınalyp ketti.
«Aıtýym kerek bolsa da,
Sóz tabý qıyn mundaıda.
Aıym-aý meni qınamaı,
Aıtqyzbaı bilseń bolmaı ma?
Alaýlap nuryń júzińnen,
Botadaı kóziń móldirep.
Jarq ete qalǵan kezińde,
Ketedi janym eljirep»,
dep keletin ánniń qaıyrmasyndaǵy tarmaqtar da jadymyzda jattalyp qalǵan. Dál osy shýmaqtardy «Azııa» tobynyń oryndaýynda tyńdaǵan kezde, ózińniń de janyń men júregiń eljirep ketetini daýsyz. Bir sózben aıtqanda, án, ánshi, aqyn úshtigi bir-birin aına-qatesiz tapqanyna eshqandaı kúmán keltire almaısyń.
Bizdiń býynnyń esinen ketpeıtin «Ǵajaıyp kúı» ánin oryndaǵan ánshiler az emes eken. Muny da sol ınternetten kórip, kóńil tolqydy. Áıtkenmen, biz úshin «Azııa» tobynyń oryndaýy bólekteý kórinetin sekildi. Qulaǵymyzǵa solardyń úni sińip qaldy ma, kim bilsin...
Ǵajap shyǵarmanyń qaıyrmasynda jazylǵandaı, «sóz tabý» qıynǵa aınalsa da, jan dúnıemizdiń túkpirinen shyqqan sózdi aıtyp otyrmyz. Árıne, ár adamnyń óz talǵamy bar. Qalaı desek te, esti tyńdarman barda, eski ánniń tabıǵatyndaǵy áýen eshqashan óshpeıtin sekildi. О́ıtkeni bizdińshe «Ǵajaıyp kúı» – shoqtyǵy bıik týyndy.
