Ot jaǵamyn dep… ot basty

Oblystyq Tártiptik keńes­tiń jańa jyldaǵy alǵash­qy otyrysynda sybaılas jem­qorlyqqa qarsy kúres zań­namasyn aıaqqa basqan mekeme basshylary aıaýsyz syn sada­ǵy­na ilinip, onyń aqyry qatań jazalaýlarǵa ulasty. Esil aýdanyna qarasty Jar­qaıyń bastaýysh mek­tebiniń meńgerýshisi Kemel Takıshev­tiń tapqany qapqany­na az bolsa kerek, kóp oılan­bastan ózin ózi «jańa qyzmetke» taǵaıyndaý týraly buıryqty berip kep jiberedi. Sóıtip, negizgi qyzmetine qosa, qazan­dyqtyń ot jaǵýshysy «laýazy­myn» qosa atqaryp shyǵa ke­ledi. Sirá, qolynan keltirip qony­shynan basqany azdaı, bıýd­jettiń qarajatyn tóbe­ge shyrt túkirip, qaltaǵa basa be­retin maıshelpekke bala­sa kerek. Qazandyqtyń oty­men kirip, kúlimen shyǵyp júr­gen qaranardaı qara kúsh ıelerine anda-sanda tóbe kór­setkeni bolmasa, jary­typ jumys iste­megen. Al, eńbek­aqy alýǵa kel­gende esesin jiber­megen. Biraq, onyń ońaı oljaǵa kenelýdi arman etip, arandaı ashylǵan aram pıǵylyn prokýratýra ókilderi áshkerelep, sońǵy núk­teni Tártiptik keńes qoıdy. Ol kinásin moıyndap, qan­sha aqtalsa da, qyzmetinen bosatý týraly usynys biraýyz­dan qabyldandy. Ot jaǵamyn dep júrip ot basqan onyń ádil­dikten taıǵan áreketi ózgelerge sabaq bolsa, kánekı! Baqyt RAMAZAN, jýrnalıst. Soltústik Qazaqstan oblysy.