Foto: polisia.kz
Ishki ister mınıstrliginiń málimetinshe, bıyl polısııa qyzmetkerleri bopsalaýdyń 400-den astam deregin tirkegen. Onyń 39-y mektepter men kolledjderde jasalǵany belgili boldy. Oqý oryndarynda 60 myńǵa jýyq profılaktıkalyq is-shara ótkizilip, onda bopsalaý, býllıng jáne zorlyq-zombylyq kórsetýmen baılanysty máseleler talqylanǵan.
Sonymen qatar, mektepter men kolledjderde anonımdi saýalnamalar júrgizilip, oqýshylar arasynda bopsalaýdyń 50-den astam yqtımal faktisi anyqtalǵan. Barlyq jaǵdaıdyń tekseriletini habarlandy.
Jyl basynan beri bopsalaýmen aınalysatyn 23 jastar tobynyń áreketine tosqaýyl qoıylǵan.
«Qyrkúıek aıynda Aqtóbe qalasynda uıymdasqan qylmysqa qarsy kúres basqarmasynyń qyzmetkerleri kolledjdiń kámeletke tolmaǵan stýdentin ustady. Ol 15 jastaǵy jasóspirimnen 50 myń teńge kóleminde aqsha bopsalaǵan. Kúdikti quryqtalyp, sotqa deıingi tergeý bastaldy», dep habarlady IIM-niń baspasóz qyzmeti.
Taǵy bir oqıǵa Jambyl oblysynda jasóspirim jeke derekterdi taratamyn dep qorqytý arqyly óz qatarlastarynan aqsha bopsalaǵan. Osyndaı 8 fakt tirkelip, qylmystyq is sotqa jiberilgen.
Al, Petropavl qalasynda polısııa qyzmetkerleri jastar tobynyń múshelerin ustaǵan. Olar zorlyq-zombylyq pen qorqytý arqyly jábirlenýshilerdi qaryz rásimdeýge májbúrlep, keıinnen ony qolma-qol aqshaǵa aınaldyryp otyrǵan. Kúdiktiler qamaýǵa alynǵan.
Ishki ister mınıstrligi qylmystyń bul túri úshin 14 jastan bastap qylmystyq jaýapkershilik qarastyrylatynyn eske saldy.
