Sheteldik týrıster sanynyń kóbeıýine yqpal etken negizgi faktorlar – Dúnıejúzilik kóshpeliler oıynynyń ótýi men tanymal ánshi Dımash Qudaıbergenniń konserti. Atalǵan is-sharalarǵa 89 memlekettiń azamattary qatysty.
Týrızm jáne sport vıse-mınıstri Erjan Erkinbaev: «Sheteldik qonaqtar negizinen Qytaı, Reseı, Úndistan, Germanııa syndy memleketterden keldi. Mysaly, Qytaıdan 8 myńnan astam, Úndistannan 6 myńnan astam, Germanııadan 4 myńnan astam týrıst tirkelgen. Álbette, bul derek elimizge týrıstik baǵyt retinde qyzyǵýshylyqtyń artyp kele jatqanyn kórsetedi», dep atap ótti.
Vıse-mınıstrdiń aıtýynsha, týrısterdiń edáýir bóligi Germanııa, О́zbekstan, Túrkııa, Qyrǵyzstan, AQSh jáne Ońtústik Koreıadan kelgen.
EQonaq júıesi Astanada 12,4 myńǵa jýyq sheteldik týrıst tirkedi. Olardyń turýǵa, kólikke, tamaqtanýǵa jáne oıyn-saýyqqa jumsaǵan jalpy shyǵyndary 15,5 mln AQSh dollaryn nemese 7,5 mlrd teńgeni quraǵan. Alys shetelden kelgen týrısterdiń ortasha shyǵyny 1 500 dollar shamasynda. Demek, Dúnıejúzilik kóshpeliler oıyndaryna kelýshiler el ekonomıkasyna qosymsha 625 myń AQSh dollar qosqan.
Aıta ketý kerek, elordanyń tanymal týrıstik nysandaryna da 7-13 qyrkúıek aralyǵynda kelýshiler sany artqan. Ulttyq mýzeı 14 myńnan astam adamdy qabyldap, «Astana-Báıterek» monýmentine 15 myńǵa jýyq týrıst kóterilip, «Nur-Álem» pavılonyn 10 myńǵa jýyq adam tamashalaǵan.
Halyqaralyq deńgeıdegi mádenı-sporttyq is-shara bolyp tabylatyn Dúnıejúzilik kóshpeliler oıyndary elimizdiń týrıstik ımıdjin nyǵaıtý úshin eleýli úles qosty. Kóshpeliler oıynyn uıymdastyrý komıtetiniń málimetinshe, etnoaýyl men oıyndardyń ózin kórýge 250 myńnan astam adam kelgen.
