Qazir atalǵan stýdııada beıneleý óneri, ulttyq bı, kórkemsóz, dombyra, vokal baǵyttary boıynsha bes úıirme jumys isteıdi. Oǵan jas erekshelikterine qaraı 200-ge tarta oqýshy tartylǵan. Olarǵa jańashyl kreatıvti bes bilikti pedagog sabaq beredi. Ár toptaǵy jetkinshekter bekitilgen sabaq kestesimen oqıdy.
Búginde stýdııa oqýshylarynyń aldy respýblıkalyq, halyqaralyq baıqaýlarda top jaryp, esimderi elimizge belgili bola bastady. Máselen, bıyl Qostanaı qalasynda ótken «DANCE LEGASY» atty halyqaralyq baıqaýda bı úıirmesiniń 26 oqýshysy toptyq bıde birinshi oryn ıelense, Almatyda ótken «HAWAII FANTASTIC TALENT» atty respýblıkalyq konkýrstan bas júldemen oraldy. Ásirese Aıjan Abylaıqyzy esimdi ónerli oqýshymyz Býrabaıda ótken bı saıysynda talantymen top jardy. Sondaı-aq ol Aqtaý qalasynda uıymdastyrylǵan halyqaralyq bı baıqaýynda da júldeger atandy. Bizdiń bıshilerimiz «Re Sol» shyǵarmashylyq ortalyǵy ótkizgen «Babalar amanaty» atty V respýblıkalyq baıqaýda da óz ónerlerimen kópshilikti tánti etip, úzdik shyqty. Bul baıqaýda stýdııa oqýshylary túrli atalym boıynsha qatysty. Aıtalyq, kórkemsóz oqýdan da N.Muhanbetqalıev pen A.Bısenǵalı sekildi jetkinshekterimiz bas júldege ıe bolsa, «mýzykalyq aspapta oınaý» atalymynda Muhtar Álıhannyń juldyzy jandy. Al «estradalyq vokal» atalymynda Nurfazyl Baqdáýlettiń de qanjyǵasy maılanyp, bas júldeni ıelendi. Osy baıqaýda jeńimpaz atanǵandardyń bári aldaǵy qarasha aıynda Dýbaı qalasynda ótetin konkýrsqa joldama aldy.
Sonymen birge Astanadaǵy «Atamura» respýblıkalyq ǵylymı-ádistemelik ortalyǵy muryndyq bolǵan «Boıaýlar qupııasy» atty baıqaýda da beıneleý óneri úıirmesiniń oqýshylary úzdikter qatarynan kórindi.
Atap aıtqanda, atalǵan baıqaýda Qanat Erasyldyń asyǵy alshysynan tússe, Qaraqat Turǵyn 1-oryn ıelendi. «Jas juldyz» respýblıkalyq baıqaýynda da Janerke Tileýǵabyl jeńimpaz boldy.
Qazir elimizde balalardyń ýaqytyn tıimdi paıdalaný maqsatynda túrli shyǵarmashylyq úıirme kóptep ashylyp jatyr. Sondyqtan biz de osy salaǵa óz úlesimizdi qosyp jatqanymyzǵa qýanyshtymyz. Menińshe, qazirgi ata-analar balanyń qalaýymen sanasady, onyń qaı baǵyttyń janyna jaqyn ekenin anyqtap, sol sala boıynsha perzentine bilim berýge tyrysady. Árıne, bul durys baǵyt. Balanyń bos ýaqytyn osyndaı úıirmeler arqyly tıimdi paıdalaný bolashaq urpaqtyń qoǵamnan óz ornyn alatynyna kóp septigin tıgizedi.
«Aıjuldyz» óner-bilim stýdııasy ashylǵannan beri nátıje men sapaǵa baǵyttalǵan biraz jumys atqaryldy. Balamen jumys isteý, olardy jetistikke jeteleý – úıirme jetekshileriniń basty ustanymy. Joǵaryda atap ótilgen jetistikterdiń nátıjesinde úıirmege kelýshilerdiń sany artty.
Bizdiń ortalyqtan áli talaı jeńimpaz shyǵatyny sózsiz. Bolashaqta úıirme sanyń kóbeıtý kózdelip otyr. Eń bastysy, biz balalardy tek óner men bilimge baýlyp qana qoımaı, olardy mádenıettilikke úıretemiz. Qoǵamnan óz ornyn oıyp turyp alatyn azamat etip tárbıelesek deımiz. Qazir oqýshylardyń ónerge beıim, bilimge qushtar bolýy ózderiniń bolashaqtarynyń jarqyn bolýy úshin qajet. Sondyqtan ata-ana balasyn óner-bilim ortalyqtaryna aparyp, úıirmeden dáris alýǵa baǵyttasa, shákirtterdiń bıikterge samǵaıtyny sózsiz.
Juldyz SÁRSENBAEVA,
«Aıjuldyz» óner-bilim stýdııasynyń jetekshisi
Qostanaı oblysy
