Sýretti túsirgen – Erlan OMAR, «EQ»
Qala ákiminiń orynbasary Ásem Núsipova ystyq tamaq uıymdastyrý men sanıtarlyq normalardy saqtaý boıynsha top qurý týraly buıryqtyń bekitilgenin málimdedi. Aldaǵy ýaqytta osy baǵyttaǵy jumys kúsheıtiledi.
Komıssııany qala ákiminiń orynbasary, depýtattar, sanıtarlyq epıdemıologtar, medısına mamandary jáne ata-analar qoǵamdastyǵynyń ókilderi kirgen vedomstvoaralyq saraptama toby basqarady.
Bıylǵy oqý jylynda jańa mázir usynylyp, ashanalarda taǵam qaýipsizdigine baǵa berilmek. Qazirgi tańda 328 mektep baqylaýda tur. Mektepterdiń 322-si ystyq tamaqpen qamtylǵan bolsa, olardyń 133 myńnan astamy áleýmettik osal toptarǵa jatady.
Qalalyq sanıtarııalyq-epıdemıologııalyq baqylaý departamentiniń dereginshe, búgingi kúni 328 mektep baqylaýǵa alynǵan, onyń 322-sinde ystyq tamaq úlestirilip, qalǵany býfet júıesimen jumys istep jatyr.
– Búginde jeke kásipkerlerge jalǵa berilgen memlekettik mekteptegi ashanalar sany – 215. Bilim basqarmasynyń málimetinshe, qazirgi kezde 54 mekteptiń ashanasyn jalǵa alýshylar aýysqan. Olar ózderine qatysty sanıtarlyq-epıdemııalyq qorytyndyny ýaqytynda alyp otyrýǵa tıis, – dedi departament basshysy Qasymhan Alpysbaıuly.
Qazaq tamaqtaný akademııasynyń mekteptegi tamaqtaný jónindegi mamany Veronıka Ýlıvanovanyń aıtýynsha, ashanalardyń óndiristik jaǵdaıy sanıtarlyq-gıgıenalyq normalarǵa sáıkestigimen qatar, tamaq ónimderine mıkrobıologııalyq zertteýler de júrgizilýi qajet.
Buǵan deıin málim bolǵanyndaı, Sybaılas jemqorlyqqa qarsy is qımyl agenttiginiń málimetinshe, Almatyda mektep ashanalaryn jóndeýge 2 mlrd teńgege jýyq qarjy bólinip, onyń naryqtaǵy baǵadan 4 ese qymbattyǵy anyqtalǵan. Jaýapty tulǵalar memlekettik satyp alý arqyly, osylaısha, aqsha jymqyrýǵa kóshken. Sybaılas jemqorlyqqa qarsy is-qımyl agenttigi monıtorıng basqarmasynyń aǵa ofıseri Álisher Qumarbekovtiń aıtýynsha, qazir bul lottarǵa tosqaýyl qoıylyp, tender toqtatylǵan. Anyqtalǵanyndaı, ár mekteptiń ashanasyn jóndeýge 70-79 mıllıon teńge kóleminde jumsamaq bolǵan. Taldaý barysynda mundaı qyzmetterdiń naryqtyq baǵasy 20 mln teńgeniń kóleminde ekeni belgili bolyp otyr. Jyl basynan beri bul baǵytta 71 mln teńgeden astam qarajat únemdeldi. Sońǵy 4 jylda 170 mln teńgeniń zańsyz jumsalýyna tosqaýyl qoıylǵan. Jaýaptylar tehnıka men jabdyqtar, janar-jaǵarmaı, keńse taýarlary, qurylys jumystaryna baǵany zańsyz kóterip otyrǵan.
ALMATY
