Kásipqoı boksta 15 jekpe-jek ótkizip, barlyǵynda jeńiske jetken Jánibek jańazelandııalyq Andreı Mıhaılovıchke qarsy aıqasqa túsedi. Osy kúnge deıin kásipqoı boksta 21 jekpe-jek ótkizip, áli de jeńilistiń kermek dámin tatpaǵan A.Mıhaılovıch – chempıondyq belbeýinen basty úmitkerdiń biri. 4 qazan kúni Aýstralııanyń astanasy Sıdneı qalasynda ótetin jekpe-jekke Jánibek tyńǵylyqty ázirlik júrgizip jatyr.
«Qazaq sportyna Sıdneı tóri qutty qashanda. 2000 jyly ótken jazǵy Olımpııa oıyndaryna jeti boksshymyz qatysyp, Aýstralııa rınginde tórteýi fınaldyq jekpe-jekte Olımpıada altyny úshin aıqasty. Bekzat Sattarhanov pen Ermahan Ybyraıymov aǵalarymyz ánuranymyzdy shyrqatsa, Bolat Jumadilov, Muhtarhan Dildábekov kúmis medalmen oraldy. Men de bala kúnimde osy aǵalarym sekildi elimizdiń mártebesin asqaqtatsam dep armandadym. Mine, arada 24 jyl ótkende Sıdneı qalasynda jekpe-jekke túsetinime qýanyshtymyn. Álemge elimizdiń kók týyn taǵy bir márte áıgileýge daıarmyn. Andreı Mıhaılovıchke qarsy aıqasqa shyǵý men úshin asa mańyzdy, sebebi ol álem chempıony degen ataqtan úmitkerlerdiń kóshin bastap tur. Maǵan ol kún kózin kólegeılep turǵan bul sekildi, sol bultty ydyratyp, kúnniń jarqyrap shyǵýyna kúsh salamyn. Bári de onyń nokaýtpen jeńiletinin biledi», dedi Jánibek Álimhanuly.
Jánibek Álimhanuly men Andreı Mıhaılovıch arasyndaǵy aıqas shilde aıynda AQSh-tyń Las-Vegas qalasynda ótýge tıis edi. Salmaq túsirý kezinde búıregi syr bergen jerlesimiz aýrýhanaǵa jetkizilip, em-dom aldy. «Qarsylastyń densaýlyǵyna baılanysty jekpe-jek ótpeıtinin Las-Vegasqa ushyp kelgen soń estip bildim. Mundaı jaǵdaıda eshteńe isteı almaımyz, qoldan keler qaıran joq», degen Andreı Mıhaılovıch. Reseıde týyp, Jańa Zelandııanyń azamattyǵyn alǵan boksshy Álimhanulyn orta salmaqta álem chempıony ataǵynan aıyrýǵa áli jetetinin málimdedi. Jánibek Aýstralııaǵa attanǵanǵa deıin jekpe-jekke daıyndyǵyn elimizde ótkizbek. Uzaq jyl ulttyq quramanyń bas bapkeri bolǵan Myrzaǵalı Aıtjanovtyń aqyl-keńesimen jattyǵýyn jalǵastyryp, sparrıng jekpe-jek ótkizýge boksshy Aman Qonysbekovti shaqyrtqan.
Fýtzal: Sańlaqtar senimdi aqtady
О́zbekstanda fýtzaldan ótip jatqan álem chempıonatynyń toptyq kezeńindegi ekinshi matchta el quramasy jeńiske jetti. D tobynda synǵa túsken jigitter Lıvııa quramasyn 4:1 esebimen utty.
Sýhaıbtiń avtogolynan keıin alǵa shyqqan jerlesterimizdi lıvııalyq oıynshylar aıtarlyqtaı sastyrdy. Tipti Hamıs gol soǵyp, tarazy basyn teńestirip te ketti. Biraq tájirıbeli Birjan Orazov, Jahanger Ráshıt, Albert Aqbalyqov enshisine gol jazyp, aıqyn basymdyqpen utýǵa septesti.
Ulttyq quramanyń bas bapkeri Paýlo Rıkardo Kaka jigitterdiń tartysty matchta jeńiske jetkeni mańyzdy ekenin atap ótti. «Iri eseppen utý kerek dep órshelengen joq jigitter. Olarǵa jeńiske jetý kerek degen tapsyrma júkteldi, sony oryndady. Onyń ústine ulttyq quramanyń shabýyl shebin nyǵaıtatyn Dáýren Tursaǵulov pen Azat Valıýlın bul matchqa qatyspady. Soǵan qaramastan jigitter baryn salyp oınady. Ulttyq qurama sapyna alǵash shaqyrylǵan, tomaǵasyn sypyryp, álemdik dodaǵa tuńǵysh qatysqan jas oıynshylar da ózderiniń talantyn áıgiledi. О́kinishke qaraı, Birjan Orazov jaraqattandy. Tezirek saýyǵyp qatarymyzǵa qosylady dep senemiz. Qurama komandanyń dárigerleri sheshimin aıtady», dedi bas bapker.
Matchta enshisine gol jazǵan Albert Aqbalyqov jankúıerlerdiń qoldaýy erekshe bolǵanyn jetkizdi. «Bas bapker Kaka alańǵa shyǵar kezde bizge tek jeńis úshin barymyzdy salýǵa jigerlendirdi. Biz úshin ekinshi matchta 3 upaı alý asa mańyzdy boldy. О́zbekstanda ótip jatqan álem chempıonatynda elimizden barǵan jankúıerler ǵana emes, baýyrlas ózbek, qyrǵyz, túrik kórermenderi de qosyla qoldaý kórsetip, tik turyp jankúıer boldy. Zaldy tundyra qıqýlap, bizge erekshe dem berdi», dedi sportshy.
Ulttyq qurama toptyq kezeńdegi sońǵy matchty erteń Tashkent qalasyndaǵy «Hýmo Arena» kesheninde Jańa Zelandııa quramasyna qarsy ótkizedi. Ázirge Ispanııa quramasy soqqan gol sanynyń basymdyǵy boıynsha kósh bastap keledi, ekinshi satyda bizdiń qurama tur. Álem birinshiliginiń alǵashqy matchynda Ispanııa quramasymen teń tarqasqan (1:1) jigitter erteń Jańa Zelandııa quramasyn iri eseppen jeńse, toptan kósh bastap, pleı-off kezeńine ótýi múmkin. Ispanııa quramasy toptyq kezeńdegi ekinshi matchty Jańa Zelandııa quramasyna qarsy ótkizip, 7:1 esebimen oısyrata utty.
Boks: «Úzdikter týrnıri» myqtylardy anyqtaıdy
Bokstan áıelder arasynda 22–28 qazan aralyǵynda Qaraǵandy qalasynda «Úzdikter týrnıri» ótedi. Ulttyq quramanyń bas bapkeri Eldos Saıdalın Azııa chempıonatyna kimderdiń baratyny Qaraǵandy rınginde anyqtalatynyn aıtty.
«Parıj jazǵy Olımpıadasynan keıin ulttyq qurama músheleriniń keıbireýi salmaq dárejesin ózgertti. «Úzdikter týrnırine» eki dúrkin álem chempıony, Parıj jazǵy Olımpıadasynyń qola júldegeri Nazym Qyzaıbaı qatyspaıdy. Bul týrnırdiń ereksheligi – dýlyǵasyz (shlem) ótedi. Jańa ereje boıynsha áıelder arasyndaǵy saıys endi dýlyǵasyz ótetindikten, boksshylar beıimdelýi kerek», dedi bas bapker. E.Saıdalın Azııa chempıonaty aıaqtalǵan soń, jyl sońyna qaraı Qazaqstan chempıonaty uıymdastyrylyp, qurama sapynda býyn almasý úderisi júretinin de jetkizdi. Iаǵnı jastar arasynda jarqyrap kóringen talanttar quramadaǵy tájirıbeli boksshylardyń keıbirin yǵystyrýy múmkin.
Álem chempıonatynyń júldegeri Alýa Balqybekova 50 kg salmaq dárejesine túpkilikti aýysqanyn málim etti. «Biz úshin dýlyǵasyz jekpe-jek ótkizý tańsyq. Jýyrda Polshada halyqaralyq týrnır ótti, dýlyǵa kımegendikten qatysýshylardyń keıbiriniń qabaǵy jarylyp, jaraqat aldy. Demek qorǵanysqa basa mán berý kerek. Qaraǵandy qalasynda ótetin týrnır Azııa chempıonatyna kimderdiń baratynyn aıqyndaıtyndyqtan da báseke joǵary bolmaq», degen boksshy 50 kg salmaqta top jarýǵa baryn salatynyn, sol maqsatta jeke jattyǵý júrgizip jatqanyn da aıtty.
