Ozattar qomaqty syıaqy alady

2022 jyldan bastap bedeldi 7 olımpıadada júldeli oryndardy ıelengen oqýshylarǵa jáne olar­dy daıyndaǵan pedagog­terge mem­leket tarapynan birjolǵy syıaqy taǵaıyndalyp keledi. Bul bilim báıgeleriniń qatarynda IMO (matematıkadan), IPhO (fızıkadan), IBO (bıologııadan), IChO (hımııadan), IOL (lıngvıs­tı­kadan), IGeO (geografııadan) jáne IOI (ınformatıkadan) halyq­aralyq olımpıadalary bar.

Osy atalǵan jarystardan altyn medal jeńip alǵan oqý­shy 1500 aılyq eseptik kórsetkish (AEK) mólsherinde aqshalaı syıaqy alady. 2024 jylǵy belgilen 1 AEK mólsheri 3 692 teńgege teń ekenin eskersek, altyn medal ıegerlerine 5 mln 538 myń teńge syıaqy beriledi. Kúmis medal úshin 1000 AEK (3 mln 692 myń teńge), qola medal úshin 500 AEK (1 mln 846 myń teńge) mólsherinde qarjylaı yntalandyrý syı­lyǵy taǵaıyndalady.

2022 jyldan beri belgilengen tártip boıynsha joǵaryda atal­ǵan bilim báıgelerine úzdik­terdi daıyndaǵan pedagogter de qar­jylaı qoldaýdan qalys qal­maýǵa tıis. Tarqatyp aıtqanda, altyn medal ıegerin daıyndaǵan peda­gogke bazalyq laýazymdyq aıly­qaqynyń 26,5 eselengen mól­sherinde qarjylaı syıaqy beri­ledi. Aıtalyq, olımpıadaǵa da­ıyn­daǵan oqýshysy altyn medal alǵan muǵalimniń belgilengen qyz­met­tik jalaqysy orta eseppen 250 myń teńge desek, onda ol osy eńbegi úshin bir rettik 6 mln 625 myń teńge syıaqy alýǵa quqyly. Al kúmis medal ıege­rin daıyndaǵan pedagogke baza­lyq laýazymdyq aılyqaqy 17,5 eselengen mólsherinde, qola me­dal ıe­gerin daıyndaǵan peda­gogke ba­za­lyq laýazymdyq aılyq­aqy 8,5 eselengen mól­she­rinde beri­le­di.

Oqý-aǵartý mınıstrliginiń aqparatyna súıensek, bıyl álem boıynsha bedeldi 7 olımpıadada júldeli oryn alǵan 26 oqýshymyz qarjylaı syıaqy alady. 2023-2024 oqý jylynyń qorytyn­dysy boıynsha elimizdiń ulttyq quramasy eń bedeldi álemdik pándik olımpıadalarda 2 altyn, 12 kúmis, 12 qola medal jáne bir dıplom ıelendi. Sonymen qatar halyq­aralyq olımpıadalardyń je­ńim­pazdaryna otandyq jo­ǵa­ry oqý oryndarynyń kez kel­ge­nine oqýǵa túsýge grant beriledi.

Esterińizge sala keteıik, byltyr 23 oqýshy 65,6 mln teńge, 20 pedagog jalpy somasy 71,4 mln teńge birjolǵy syıaqy aldy. Jalpy 12 iri halyqaralyq jarysqa qatysqan 1218 oqýshynyń 603-i medal ıegeri atandy. Iаǵnı álemdik dodalarda elimizdiń namysyn qorǵaǵan árbir ekinshi qatysýshy júldeli orynǵa ıe boldy.