Sýret: ru.freepik.com
Baǵdarlama Túrkistan, Atyraý, Mańǵystaý jáne Almaty oblystarynda júzege asyrylyp jatyr. Atalǵan óńirlerge matematıka, fızıka, hımııa, orys tili men ádebıeti, shet tili muǵalimderi kóbirek qajet. Onda pedagogterdi qoldaýdyń birqatar sharasy qarastyrylǵan. Atap aıtsaq, 150 paıyzǵa deıingi mólsherde yntalandyrý maqsatynda qosymsha aqy tóleý, sondaı-aq arnaıy baǵdarlamaǵa qatysýshy joǵary oqý ornynyń túlekterine «pedagog-moderator», al «pedagog-sarapshy» men «pedagog-zertteýshige» bir saty joǵary biliktilik sanatyn berý syndy shabyttandyrý sharalary bar.
«Konkýrsqa joǵary pedagogıkalyq, joǵary kásiptik bilimi bar pedagogter, biliktilik sanattary bar pedagogter, sondaı-aq oqý úlgerimi jaqsy joǵary oqý oryndarynyń pedagogıkalyq mamandyqtarynyń túlekteri turǵylyqty jerine qaramastan qatysa alady. Baıqaýdan iriktelip, tórt oblystyń birine qonys aýdarǵan muǵalimderdiń balalary balabaqshada, orta mektepte orynmen qamtylady jáne olarmen eńbek sharty 5 jylǵa jasalady», deıdi Oqý-aǵartý mınıstrligi Orta bilim komıtetiniń tóraǵasy Qanybek Jumashev.
Baıqaý eki kezeńnen turady. Alǵashqy synaq – kompıýterlik testileý men esse jazý formatynda bolady. Ekinshi kezeńge ótkender júzbe-júz áńgimelesý múmkindigine ıe bolady. Testileý men esse jazý onlaın formatta elimizdiń 17 óńirinde Nazarbaev zııatkerlik mektepteriniń bazasynda qatysýshynyń tańdaýy boıynsha qazaq, orys nemese aǵylshyn tilinde ótedi. Muǵalimderdi bos laýazymdarǵa tartý úshin tıisti óńirlerdiń oblystyq bilim basqarmalary janynan úılestirý keńesteri, sondaı-aq mınıstrlik janynan konkýrstyq komıssııa qurylady. Aıta keteıik, birinshi kezeńniń nátıjesi boıynsha 45 adam qujat tapsyrǵan.
