Soltústik Qazaqstanda tótenshe jaǵdaılar jıilep tur

PETROPAVL. 27 qańtar. Petropavl qalalyq mádenıet úıinde Tótenshe jaǵdaılar jónindegi komıtet tóraǵasynyń orynbasary, órtke qarsy qyzmet general-maıory Serik Áýbákirovtiń tóraǵalyǵymen Soltústik Qazaqstan oblystyq departamentiniń ótken jyly atqarǵan jumystarynyń qorytyndysyna jáne alda turǵan mindetterdi, sonymen birge sybaılas jemqorlyqtyń aldyn alý máselelerin talqylaýǵa arnalǵan keńes bolyp ótti. Atalmysh sharaǵa oblys ákiminiń orynbasary Vladımır Býbenko qatysty. Bul týraly oblystyq tótenshe jaǵdaılar departamentiniń baspasóz qyzmeti habarlady. Oblystyq tótenshe jaǵdaılar jónindegi departament bastyǵynyń mindetin atqarýshy, órtke qarsy qyzmet polkovnıgi Áset Ysmaǵulovtyń esebine qaraǵanda, byltyr 235 shara ótkizilgen. Qarly burqasyn qursaýynan 497 adam men 98 tehnıka bosatylyp, qaýipsiz jerge kóshirilgen. Oblys aýmaǵynda tótenshe jaǵdaılardy joıý úshin quramynda 1 032 adam men 440 tehnıka bar 14 shuǵyl qımyl jasaǵy qurylyp, jumys isteýde. О́rt qaýipsizdigin qamtamasyz etý úshin birqatar aýyldarda órt sóndirý qosyndary qurylǵan. Qazirgi ýaqytta aýyldyq eldi mekenderde 157 órt sóndirý avtomobıli jáne 1 017 beıimdelgen tehnıkasy bar 497 erikti órt sóndirý qurylymy jumys isteıdi. 123 zardap shekken adamǵa alǵashqy medısınalyq kómek kórsetilgen. Departament qyzmetkerleri tótenshe jaǵdaılardyń aldyn alý maqsatynda oblystyń 505 nysanyna tekserý júrgizip, órt qaýipsizdigin saqtaýǵa salǵyrt qaraǵan 546 adamdy ákimshilik jaýapkershilikke tartty. Atqarylǵan sharaldarǵa qaramastan ótken jyly oblysta 155 tótenshe jaǵdaı oryn alǵan. 812 órt oqıǵasy tirkelip, 119 mıllıon teńge materıaldyq shyǵyn kelgen. 47 adam qaza tapqan. О́mir Esqalı. Derek: Soltústik Qazaqstan oblystyq tótenshe jaǵdaılar jónindegi departamenttiń baspasóz qyzmeti. Sýret: news.nur.kz.