Aýyl sharýashylyǵy basqarmasynyń derekterine qaraǵanda, 2,4 mln gektar alqaptyń dándi daqyldary bastyrylyp alynǵan. Qazir kúzgi dala jumystary órmek júzinen aýyp ketti. О́ńirdegi gektar berekesi 13 sentnerden aınalyp jatyr. 3,1 mln tonna astyq jınaldy.
Keıingi birneshe jyl boıy aýa raıynyń qolaısyzdyǵynan dıqandar qansha ter tókkenimen, tolymdy tabysqa qol jetkize almaı, jigerleri qum bolyp júr edi. Bıyl kókten ıip, jerden berdi.
«Kóktemde 11 myń gektar alqapqa dándi daqyldar tuqymyn septik, – deıdi «Namys group» seriktestiginiń dırektory Erden Eleýov. – Onyń 5 myń gektary dándi daqyldar bolsa, maıly daqyldar men burshaq 4 myń gektar alqapqa egildi. Bıdaı bitik shyqty. Kúzgi oraqqa alymdylyǵy joǵary 12 kombaın qatystyrylyp jatyr».
Masaqtary kere qarys aqyq dán tunǵan alqap lúp etken samal jelmen teńizdeı týlaıdy. Aramshópten ada.
«Mundaı bitik ósken egin kópten beri yryzdyq bolyp úıirile qoımap edi, – deıdi mehanızator Beslan Mýsıev. – О́nim joǵary bolǵan soń, mehanızatorlardyń da kóńili kóterińki. Táýligine 150 tonna astyq bastyramyz. Bes jyldan beri kombaınshy bolyp jumys istep kelemin. Bıylǵy eń úlken tabys arpa alqaptarynan buıyrdy. Gektar berekesi 60 sentnerden aınaldy. Memlekettiń qoldaýynyń arqasynda janar-jaǵarmaıdan tapshylyq joq».
Qazir osy aýdandaǵy «Dıqan plıýs» seriktestiginde 200-den asa adam qaýyrt jumysqa kirisken. Kóktemde 23 myń gektar alqapqa egin egilipti. Onyń 12 myń gektary – bıdaı. Qalǵany – maıly daqyldar. Yrysy mol jyly gektar berekesi 30 sentnerden aınalýda.
«Barlyq jumys mehanıkalandyrylǵan. Burynǵydaı emes, qazir egistik alqaptardyń jaı-kúıin, óńdeýden qashan jáne qalaı ótkenin, aldyńǵy jyldardaǵy gektar berekesin kórip, taldaı alamyz, – deıdi seriktestik dırektory Denıs Shvaıbovıch. – Árbir kombaınnyń bastyrǵan astyǵynyń sapasy men esebi júrgiziledi. Kórsetkishterdi esepteıtin avtomattandyrylǵan júıe qyrmandarǵa da qoıylǵan».
Dıqandarmen dıdarlasqan oblys ákimi Marat Ahmetjanovtyń aıtýynsha, óńirdegi agroónerkásip keshenin qoldaýǵa shamamen 130 mlrd teńge qarajat bólingen. Sýbsıdııa mólsheri – 46,5 mlrd teńge. Máselelerdi jedel sheshý úshin oblystyq ákimdikte kúzgi dala jumystaryn úılestirý jóninde jedel shtab qurylǵan.
«Basty mindet – kúzgi dala jumystaryn úılesimdi uıymdastyryp, jerde óngendi jerde qaldyrmaý, – deıdi oblys ákimi Marat Ahmetjanov. – Qyrmanǵa jetkizilgen qyzyl dán – el yrysy».
Memlekettik qoldaýdyń arqasynda kósegesi kógerip kele jatqan dala erleriniń jalǵyz-aq alańdaıtyn tusy – aýa raıy. Endi bir-eki apta ashyq bolsa, yryzdyqtyń mol bolary daýsyz.
Aqmola oblysy,
Zerendi aýdany
