Oqýshylar arasynda Ábish shyǵarmalaryndaǵy Mańǵystaý taqyrybyn nasıhattaý, jastardyń kitap oqýǵa qyzyǵýshylyǵyn arttyrýdy kózdeıtin is-sharaǵa Munaıly aýdany turǵyndarynyń basym bóligi bolyp tabylatyn shetten kelgen qandastardyń balalary kóbirek tartyldy. Naqtyraq aıtqanda, osynaý rýhanı báıgege aýdandaǵy 14 mektepten 43 oqýshy qatysty.
Baıqaý sharty boıynsha qatysýshylar Ábish Kekilbaıulynyń «Qus qanaty», «Avtomobıl», «Báseke», «Báıgetory» hıkaıalaryn bir aı boıy oqyp aldyn ala daıyndaldy. Birinshi kezeńde eki shyǵarma boıynsha oqýshylar test tapsyrdy, odan súrinbeı ótkender taǵy eki kún daıyndalyp, ekinshi kezeńde taǵy eki shyǵarma boıynsha test suraqtaryna jaýap berdi. Ekinshi kezeńniń synynan óte alǵan júırikter úshinshi kezeńde «Á.Kekilbaevtyń «Shyńyraý» povesiniń ıdeıalyq-kórkemdik erekshelikteri» týraly esse jazyp, taqyryptyń ashylýy, ádebı taldaý ádisi, synı oılaý daǵdysy, grammatıkalyq saýattylyǵy men stıli turǵysynan synǵa tústi.
Professor, fılologııa ǵylymdarynyń doktory Ádilet Qabylov bastaǵan qazylar quramyna júzden júırikti anyqtaý ońaıǵa túspegen. Jeńimpazdardy marapttaý Aqtaý qalasyndaǵy oblystyq kitaphana ǵımaratynda ótti. Kitapqumar qurbylarynyń qýanyshyna ortaqtasqan Munaıly aýdandyq óner mektebiniń shákirtteri myń burala bılep, án men kúıdi tógiltti.
«Bul is-sharany ulttyq rýhanııatymyz ben memleket isinde óshpes iz qaldyrǵan kemeńger tulǵa, zańǵar jazýshy Ábish Kekilbaıulyn eske alyp, onyń tól ádebıetimizdiń poezııa, proza, dramatýrgııa, syn, pýblısıstıka jáne aýdarma janrlaryna qosqan orasan úlesin, jalpy shyǵarmashylyq joly men azamattyq bolmysyn nasıhattaýǵa arnap otyrmyz. Bizdiń bastamamyzdy qoldap, atalǵan baıqaýdy óz aýmaǵynda ótkizýge kelisim bergen Munaıly aýdany ákimdigine alǵys bildiremiz. Jastar – eldiń bolashaǵy, olardyń ulttyq ónerge, mádenıet pen ádebıetke tereń qanyǵa ósýine jaǵdaı týǵyzý – bizge mindet. Bul osy maqsatta týyndaǵan oı edi, munaılylyq balalardyń yntasyn, qulshynysyn kórip qýanyp turmyz. Bul baǵyttaǵy jumysymyz jalǵasyn taba beredi, kitap oqýshylar básekesin qyzǵylyqty formatta ótkizý arqyly qazaq ádebıeti kórnekti ókilderiniń ómiri men shyǵarmashylyǵyn oqýshylar arasyna nasıhattaı beretin bolamyz», degen «Qazaqstan Constrauction Holding» JShS dırektory, «Ábish oqýlary» baıqaýy ıdeıasynyń avtory jáne demeýshisi Nuralhan Kýlchıkov jeńimpaz jetkinshekterge baǵaly syı-sııapat tapsyryp, Munaıly aýdandyq kitaphanasyna tartý retinde onnan astam ústel men oryndyq beriletinin jetkizdi.
О́ńirdiń zııaly qaýym ókilderi jastardy kitap oqýǵa shaqyrǵan baıqaýdyń máni men maǵynasyn, uıymdastyrylýyn joǵary baǵalady.
Mańǵystaý oblysy
