Osyǵan baılanysty oblys ákimi Nurlybek Nálibaevtyń tóraǵalyǵymen ótken májiliste aımaq basshysy operatorlardan satylym lımıtin alyp tastaýdy talap etip, gaz tapshylyǵyn qoldan jasaýǵa tyıym saldy.
«Operatorlardyń gazdy talonmen satýynyń sebebin jaqsy bilemiz. Olar jeke jáne zańdy tulǵalarmen kelisimge kelip, solardy gazben tolyq qamtamasyz etýge jumys jasap otyrǵany eshkimge qupııa emes. Áleýmettik gazdy tek halyqqa satý kerektigin byltyr da qatań eskertkenbiz. Bul máselede men halyqty qoldaımyn, qarapaıym turǵyn gaz tapshylyǵynan zardap shekpeýi kerek. Gaz quıý beketterinde kezek bolmaýyn qadaǵalap, qazirgi qoıylǵan lımıtti alyp tastańyzdar», dedi oblys basshysy.
Energetıka mınıstrliginiń 26 maýsymdaǵy №233 buıryǵyna sáıkes suıytylǵan gazdyń baǵasy 1 shildeden bastap óskeni belgili. Osy kúni óńirde 1 lıtr úshin shekti bólshek saýda baǵasy 70, al oblys ortalyǵynan 200 shaqyrymnan astam qashyqta ornalasqan shalǵaı aýdandarda 75 teńge bolyp tur. Jaz aılarynda Túrkistan oblysy men Shymkent qalasynda gaz tapshylyǵy qatty baıqaldy. Ulytaý oblysynda baǵa buryn 76-81 teńge bolsa, qazir 84-89 teńgege jetip, bizdiń óńirmen salystyrǵanda edáýir kóterilgen. Osydan-aq Qyzylordadaǵy arzan gazdyń qaıda jylystap jatqanyn shamalaýǵa bolady.
Jıynda jaýapty basshylarǵa gazdyń basqa óńirlerge tasymaldanbaýyna Túrkistan, Ulytaý, Aqtóbe oblystarynyń shekarasyna táýlik boıy kezekshilik qoıý tapsyryldy. Básekelestikti qorǵaý jáne damytý departamenti Qyzylorda qalasy jáne aýdan ákimderimen birlesip, barlyq operatordyń gaz qoryna monıtorıng júrgizip, talonmen satý barysyn, onyń baǵasyn zertteýge tıis. Eger zańnama talaptary buzylsa, naqty shara qoldanylady.
Oblystyq kásipkerlik jáne ónerkásip basqarmasynyń basshysy Bekbolat Sháripbekov máselege oraı habarlama jasady. Osy kúni oblys aýmaǵynda 25 operator 210 avtogaz quıý beketi arqyly suıytylǵan munaı gazyn satyp otyr. Qyrkúıek aıyna aımaqqa 7 184 tonna gaz bólingen.
Operatorlar kommersııalyq gazdy óz qarajatyna alýy kerek. Al áleýmettik gazdy joǵary baǵamen satqandar jaýapkershilikke tartylady. Aımaq basshysy operatorlarmen kezdesýinde osyny qatań eskertip, jeńildikpen satylatyn janar-jaǵarmaıdan paıda kórýdi kózdeıtindermen kelisimshart buzylatynyn eskertti.
«Memleket qoldaýymen tómen baǵada ákelingen gazdy paıda kórý úshin bıznes ókilderine, júk kólikterine, syrtqa satatyn kompanııalar kesirinen gaz tapshylyǵyn qoldan jasap otyrmyz. Jeńildikpen satylatyn gaz áleýmettik taýar bolǵandyqtan onyń ıgiligin aldymen qarapaıym halyq kórýi kerek. Kásipkerlerdi qoldaımyz árıne, biraq olardy jurtshylyq esebinen jarylqaýdyń jóni joq. Turǵyndardy 100 paıyz qamtamasyz etkennen keıin ǵana artylǵanyn satýǵa bolady. Avtogaz beketterinde kezek, lımıt qoıý, basqa da shekteýler múlde bolmaýǵa tıis. Jaýapty basshylar kúndelikti reıd uıymdastyryp, satý barysyn tekserýi qajet. Joǵary baǵa qoıatyn, gazdy maqsatyna saı satpaıtyn kásipkerlermen kelisimshart buzylady», dedi Nurlybek Mashbekuly.
Baǵany retteýdiń amaly retinde jıynda «Baıqońyr» ÁKK janynan biryńǵaı operator quryp, gaz qoryn saqtap, satý jaıynda usynys aıtyldy. Korporasııa on kún ishinde tıisti usynys berip, máseleni qolǵa alýy kerek.
Qyzylorda
