Petropavlda Máýlit kúni atap ótildi

PETROPAVL. 27 qańtar. Eki dúnıeniń sardary, adamzattyń ardaqtysy, sońǵy paıǵambar Muhammedke (s.ǵ.s.) arnalǵan Máýlit merekesin ataý úshin N.Pogodın atyndaǵy Soltústik Qazaqstan oblystyq orys drama teatryna jınalǵandardyń qarasy qalyń boldy. Bul týraly «Qyzyljar» meshitiniń baspasóz qyzmeti habarlady. Mereıli shara shymyldyǵy qasıetti Quran Kárim aıattarymen ashyldy. Salaýat aıtyp, saýap jınaýǵa kelgen jamaǵatty Qyzyljar óńiriniń bas ımamy Kenjetaı qajy Baıkemeluly, oblys ákiminiń orynbasary Anarhan Dúısenova quttyqtady. «Muhammed paıǵambardyń (s.ǵ.s.) jibekteı jumsaq, sútteı aq, sýdaı móldir baǵa jetpes minez-qulqy, teńizdeı tereń aqyldylyǵy ǵasyrlar boıy tánti etip keledi. Ulttyń uly ustazy Ahmet Baıtursynov halyqtyń baǵyn ashar qundylyqtardyń qataryna dindi de qosqan. Islam dininiń ýaǵyzdaıtyny – ımandylyq, adamgershilik, adaldyq jáne tazalyq. Kózdeıtin maqsaty – eldiń tynyshtyǵy, halyqtyń birligi. Elbasymyz Qazaqstannyń shyqqan shyńy men baǵyndyrǵan bıikteriniń eń basty sebebi, birlik dep atap kórsetti. Barshamyzǵa Máýlit kúni Allanyń nury jaýsyn! Júrekterimizge jylylyq pen meıirbandylyq uıalap, týǵan elimiz órkendep, gúldený jolyndaǵy tilekterimiz qabyl bolsyn», dedi Anarhan Qalıqyzy. Máýlit merekesine arnaıy kelgen Reseı Federasııasynyń Sibir okrýgi boıynsha múftıi, Omby qalasynyń bas ımamy Bota Bakýlın de musylman qaýymǵa jyly lebizin arnady. Saltanatty sharanyń konserttik baǵdarlamasynda dinı ánder shyrqalyp, tárbıelik máni bar kórinister qoıyldy. Máýlit salaýatyn aq jaýlyqty ájelerden quralǵan top oryndady. Maǵynaly hadıster men óleńder oqyldy. О́mir Esqalı. Derek, sýret: «Qyzyljar» meshitiniń baspasóz qyzmeti.