Sýretti túsirgen – Erlan OMAR, «EQ»
Osy ýaqytqa deıin óńirdegi 18 ben 27 jas aralyǵyndaǵy azamattarǵa shaqyrtý qaǵazy joldanypty. Qazir jastar shaqyrý qaǵazynda kórsetilgen mekenjaıǵa kelip, medısınalyq tekseris pen kásibı-psıhologııalyq irikteýden ótip jatyr. Qorǵanys isteri jónindegi departament bastyǵynyń orynbasary Jasulan Shańqulovtyń aıtýynsha, kúzgi shaqyrylymda UQK Shekara qyzmetine – 170, Ulttyq ulanǵa – 280, memlekettik kúzet qyzmetine – 10, al Qarýly kúshter qataryna 420 azamat jiberiledi.
Oblystyq jıyn pýnktine barǵanymyzda, on shaqty jigit medısınalyq tekseristen ótip jatqanyn kórdik. Jalpy, shaqyrý jiberilgenderdiń 70-80 paıyzy keletin kórinedi. Olardyń deni jıyn pýnktindegi medısınalyq saraptama, test synamasy men polıgrafııalyq tekseristen keıin áskerge attanady. Osy jyly kóktemgi áskerge shaqyrý jospary 103 paıyzǵa oryndalypty.
Búginde jurt arasynda jaýaptylar shaqyrylǵandardyń densaýlyǵyn shala-sharpy tekserip, ásker qataryna qosýǵa asyǵady degen túsinik qalyptasqan. Degenmen qorǵanys isteri jónindegi departament mamandary muny joqqa shyǵaryp otyr.
«Shaqyrýshylar arasynda Qyzylorda qalasynan áskerge barýǵa yntaly jastar kóbeıip otyrǵany qýantady. Aýdandardan da kelip jatqandar qatary az emes. Kóktemgi naýqandy jaman aıaqtaǵan joqpyz. Kúzde de sol deńgeıden kórinemiz degen úmit bar. Shaqyrylǵandar medısınalyq, psıhologııalyq irikteýsiz, polıgrafııalyq tekserýsiz ásker qataryna alynbaıdy. Osynyń ishinde polıgrafııalyq tekserý arqyly azamattyń jan balasyna aıta almaı júrgen syry, psıhologııalyq jaı-kúıi anyqtalyp jatady. Otan qorǵaýshylar sapyna qosqan sarbazdar saýlyǵy úshin jaýapkershilik joǵary. Sondyqtan olar jan-jaqty tekseriledi», deıdi Qorǵanys isteri jónindegi departament bastyǵynyń orynbasary Jasulan Shańqulov.
Qarmaqshylyq Nurlan Damırov – jaqynda ǵana Qorqyt ata atyndaǵy Qyzylorda ýnıversıtetin bitirgen jas. Otbasyndaǵy jalǵyz balanyń áskerge baramyn degen talabyna úıindegiler de qarsy bola qoımapty. «Ásker – jigitti shyńdaıtyn mektep. Al onyń talabyna tózip, Otandy qorǵaýǵa úles qosý – ár azamattyń paryzy», deıdi ol.
Bolashaq sarbazdar úshin kásibı psıhologııalyq irikteý jumysynyń da mańyzy zor. Ekimyńynshy jyldar basynda qurylǵan bul júıege sáıkes merzimdi áskerı qyzmetke shaqyrýshylar, kelisimshartpen qyzmet óteıtinder, áskerı oqý ornyna túsetin azamattar «Aqsuńqar» psıhodıagnostıkalyq kesheni boıynsha Qorǵanys mınıstrligi bekitken test suraqtaryna jaýap beredi.
«Bul jastardyń fızıkalyq ázirliginen bólek, moraldyq jáne psıhıkalyq daıyndyǵyn da zerdeleýge úlken múmkindik beredi. Árqaısysynan anketa alynyp, sol arqyly olardyń otbasylyq jaǵdaıyn, áke-sheshesimen qarym-qatynasyn, áskerge qyzyǵýshylyǵyn anyqtaımyz. Osy kúni shekara qyzmeti áskerı bólimimen jumys istep jatyrmyz. Olardan da psıholog, polıgrafolog mamandar keldi. Kóp uzamaı tekseris qorytyndysymen jastardy kategorııa boıynsha komandaǵa daıyndaımyz. Testten ótpeı qalatyndar da tabylady. Olardyń qatarynda áskerge barǵysy kelmeıtinder kóp. Sonymen qatar suraqqa jaýap berýge bilim deńgeıi jetpeıtinder de bolady. Ondaı balalarǵa kómek kórsetemiz. Al shaqyrylýshynyń aýrýy anyqtalǵan jaǵdaıda medısınalyq komıssııa tóraǵasy arqyly dáriger psıhıatrǵa joldamamen jiberemiz», deıdi Qyzylorda oblystyq Qorǵanys isteri jónindegi departamenttiń psıhologııalyq qyzmet bastyǵy, maıor Nellıa Ysqaqova.
Qyzylorda
