2,3 mln tonna astyq qambaǵa quıyldy. Oblystyq Aýyl sharýashylyǵy jáne jer qatynastary basqarmasynyń basshysy Kenesh Álimjanovtyń aıtýyna qaraǵanda, gektar berekesi 13 sentnerdiń tóńireginde.
Bıyl kóktem men jazda ylǵal mol tústi. Erte kóktemde kún qabaǵy bir ashylmaı, kóktemgi egis naýqany da kesheýildep aıaqtaldy. Sol sebepti, eginniń pisýi de baıaý. «Qazgıdromet» mekemesiniń boljamyna qaraǵanda, qyrkúıek aıynda ylǵaldyń ortasha kórsetkishi 80 paıyz bolǵan. Nóser jaýyn qol baılap, alǵa umtylǵan qadamdy keri ketirip, berekesin alǵan soń amalsyz kidirgen dıqandar kún ashyla salysymen bilek biriktirip, iske kirisken. О́ńir qazir táýligine 200 myń gektar alqaptyń eginin oryp jatyr.
Jumystyń ónimdi bolýy qýatty tehnıkaǵa baılanysty. Bul oraıda 8,9 myń astyq kombaıny alqapqa shyǵarylǵan. Olardyń 4,8 myńy – zamanaýı joǵary ónimdi tehnıka. 4,8 myń júk kóligi alqaptan qyrmanǵa, qyrmannan elevatorlarǵa dán tasymaldaıdy. Osy jyly óńirdiń aýyl sharýashylyǵy qurylymdary jalpy 28,5 mlrd teńge bolatyn 246 traktor, 115 kombaın satyp aldy.
– Oǵan qosymsha jeńildetilgen nesıe arqyly 80 traktor, 140 kombaın, 25 ártúrli qurylǵy alyndy, – deıdi basqarma basshysy, – qazir alqaptan jetkizilgen dándi 66 astyq qabyldaý kásiporny qabyldap, keptirip jatyr. О́ńirdegi astyq qabyldaý oryndaryna 2,8 mln tonna dán syıady. Barlyq múmkindikti eksheı saraptaǵanda, 7,2 mln tonna astyq saqtaýǵa múmkindik bar. Bul aımaqtaǵy bar yryzdyqty tolyq qabyldaı alamyz degen sóz.
Basqarma basshysynyń aıtýynsha, astyq qabyldaý oryndaryna 558 myń tonna jańa astyq ónimderi jetkizilgen. Onyń 60 paıyzy úshinshi klastyń talaptaryna saı. Ylǵal mol bolǵandyqtan keı alqaptar sapasy sál tómendeý ónim berip jatyr. Arpanyń kórsetkishi jaqsy. Ortasha esep boıynsha 98,1 paıyzy – ekinshi klasty.
Jaýyn-shashyndy jyly alqaptaǵy astyq qabyldaý oryndaryna ylǵaldy jetkizilýde. Sondyqtan qazir qabyldaý oryndary táýlik boıy jumys istep jatyr. Keıbir elevatorlardyń aldynda uzyn sonar kezek te paıda boldy. Mundaı keleńsiz kórinis Aqkól aýdanynyń elevatorynda baıqalǵan. Sebebin saraptasańyz, aýdan elevatoryna kórshiles aýdandardyń birqatar sharýashylyǵy da astyq tapsyrady eken. Taǵy bir aıta ketetin dúnıe, astyq qabyldaý oryndarynyń demalys kúnderi jumys istemeýi. Qazir bul másele de oń sheshimin tapty. Kenesh Álimjanovtyń aıtýyna qaraǵanda, elevatorlarǵa qatysty aýyl sharýashylyǵy qurylymdarynyń ókpe-nazy óńirdegi 66 elevatordyń ekeýine ǵana baılanysty aıtylǵan. Týyndaǵan máseleler jedel sheshildi. Bul oraıda oblysta kúzgi dala jumystaryn úılestiretin jedel shtabtyń qurylýy septigin tıgizip otyr.
– Qazirgi mańyzdy máseleniń biri – astyqtyń baǵasy, – deıdi basqarma basshysy, – dán baǵasy ósse, sharýalardyń da eńsesi kóterilip qalar edi.
El yryzdyǵyn ysyrapsyz jınap alý jumysy dalada da, astyq qabyldaý oryndarynda da qaýyrt kúıge engen. О́ńirdegi 265 dán keptiretin qurylǵy saǵatyna 9,6 myń tonna astyq keptire alady. Bul jumysqa 22,8 myń tonna jeńildetilgen janar-jaǵarmaı, 1,8 myń tonna gaz bólingen.
Sheshýshi shaqta uıymshyldyqpen iske kirisken dıqandar el yryzdyǵyn molaıtyp, jerde ósken dándi jerde qaldyrmaımyz dep eńbek maıdanynda júr.
Aqmola oblysy
