Soltústik Qazaqstanda 92 tapansha, 24 myltyq tárkilendi

PETROPAVL. 27 qańtar. Ústimizdegi jyldyń 1 qańtarynan bastap gazben zaqymdaý qarýlaryn satyp alý respýblıkalyq aksııasy bastalǵaly Soltústik Qazaqstan oblysynda qarýdy óz erikterimen tapsyrýshylardyń qatary ósip keledi. Bul týraly oblystyq ishki ister departamentiniń baspasóz qyzmeti habarlady. Búginge deıin jeke tulǵalardan «OSA», «Strajnık», «Egıda» markaly gazben zaqymdaıtyn 92 tapansha pen 24 tegis oqpandy jáne ıir oıyqty ańshy myltyǵy alynǵan. «Qarýdyń tehnıkalyq jaǵdaıyna sáıkes úsh sanat boıynsha beriletin ótemaqy onyń qunynyń 50-90 paıyzyn quraıdy. Máselen, uńǵymasyz «OSA» qarýy úshin 20-30 myń teńge tólenedi. Aksııany júzege asyrýǵa respýblıkalyq qazynadan 22 mıllıon teńge bólindi», deıdi lısenzııalyq ruqsat berý júıesi bóliminiń jetekshisi Erkin Hamzın. Úkimet qaýlysyna sáıkes gazben zaqymdaý qarýlaryn erikti túrde tapsyrýdan bas tartqan azamattar 2016 jylǵy 1 qańtardan bastap qylmystyq jaýapkershilikke tartylatyn bolady. О́mir Esqalı. Derek: Soltústik Qazaqstan oblystyq ishki ister departamentiniń baspasóz qyzmeti. Sýret: aikyn.kz.