Sýret: ru.freepik.com
Astana turǵyndary Jókeı kólindegi «Temnobor» ormanshylyǵynyń erekshe qorǵalatyn tabıǵı aýmaǵyndaǵy kólge aý salǵan. Inspektorlar zańsyz áreketke barǵan azamattardy reıd kezinde qolǵa túsirip, olardyń jalpy salmaǵy 640,3 kg tartatyn 464 balyq aýlaǵanyn bilgen. Balyqtyń 631,6 kılosy sazan, 8,7 kılosy taban. Bul oqıǵa – keıingi 5 jylda «Býrabaı» ulttyq parkiniń aýmaǵyndaǵy sý aıdyndarynda tirkelgen eń iri brakonerlik fakti. Saldarynan tabıǵatqa kelgen zalal – 9 132 827 teńge. Qazirde quqyq buzýshylyq boıynsha barlyq derek Birjan sal aýdanynyń polısııa bólimine berilgen.
Keıingi jyldary Jókeı kólinen zańsyz balyq aýlaý faktileri jıilep ketti. Bıyl Ulttyq parktiń kólderinde tirkelgen segiz faktiniń beseýi dál osy sýqoımasynda oryn aldy. Quqyq buzýshylar qylmystyq jaýapkershilikke tartyldy. Sońǵy faktige deıin jalpy shyǵyn 2,5 mıllıon teńgeni quraǵan. Reti kelgende sý aıdyndaryn qorǵaýǵa, ıhtıofaýnany saqtaýǵa «Býrabaı» memlekettik ulttyq tabıǵı parkiniń dıreksııasy kólderdiń jaǵasynda Smart National Park Burabay aqyldy beınebaqylaý júıelerin ornata bastaǵanyn aıta keteıik. Mundaı kameralar birinshi dál osy Jókeı kóliniń jaǵalaýyna ornatyla bastaǵan. Jyl sońyna deıin kameralar iske qosylsa, kóldegi jaǵdaıdy tıimdi baqylaýǵa, brakonerlerdiń áreketin jedel toqtatýǵa múmkindik týady.
«Býrabaı» ulttyq parkiniń dırektory Sergeı Bykovtyń aıtýynsha, beınebaqylaý kameralary brakonerlerden bólek, park aýmaǵynda tirkeletin basqa da zańsyzdyqtardy anyqtaýǵa múmkindik beredi.
«Inspektorlar jyl basynan beri zańsyz balyq aýlaý faktisi boıynsha birneshe brakonerdiń ústinen tústi. Zańsyz áreketke barǵandar jaýapqa tartyldy. Endi kólder aýmaǵynda jańa úlgidegi beınebaqylaý tehnologııalaryn engizip jatyrmyz. Bul qadam brakonerlerdiń jolyn kesip, ıhtıofaýnany saqtaýǵa septesedi. Sonymen qatar jartastardy búldirip, kól aýmaǵyna qoqys tastaıtyn buzaqylarǵa da tosqaýyl bolady dep úmittenemiz», deıdi S.Bykov.
