Elordada Ázerbaıjannyń Qazaqstandaǵy mádenı kúnderi aıasynda «Muhammed Fızýlı. Ǵazaldar, hasıdalar – 530 óleń joly» atty jınaqtyń tanystyrylymy bolyp ótti. Is-sharaǵa eki eldiń bir top zııaly qaýym ókilderi men mádenıet qaıratkerleri qatysty. Tusaýkeser tizginin qolǵa alǵan Ázerbaıjan Jazýshylar odaǵynyń múshesi, aqyn, jazýshy Ilham Fahmı Shyǵys juldyzynyń jyrlaryn jatqa oqyp, qonaqtarǵa sózden marjan shashty.
Is-sharada alǵashqy bolyp sóz alǵan Mádenıet jáne aqparat mınıstrligi Qujattama jáne kitap isi komıtetiniń tóraǵasy Rýstam Álı qos halyqtyń rýhanı túbirine úńilip, mádenı baılanysyn atap ótti.
– Biz Ázerbaıjan men Qazaqstan baýyrlas elder deımiz. Bul jaı ǵana sóz emes, eki eldiń tamyry tereń týystyǵynyń dáleli. Qos halyqtyń ádebı, mádenı ortaq dúnıeleri mol, solardyń qatarynda «Qorqyt ata kitaby», Mahmud Qashqarıdyń «Dıýanı luǵat at-túrk», Júsip Balasaǵunı men Imadeddın Nasımıdiń fılosofııalyq eńbekterin aıtýǵa bolady. Al túrki tiliniń jer júzine tanylýyna úles qosqan, Ázerbaıjan halqynyń klassık aqyny Muhammed Fızýlıdiń bul jınaǵyn Túrki mádenıeti jáne murasy qory shyǵaryp otyr. Aqyn murasyn nasıhattaýda bul eńbektiń orny erekshe,– dedi ol.
Ázerbaıjan Mádenıet mınıstriniń keńesshisi Oleg Amırbekov óz sózinde Muhammed Fızýlı shyǵarmashylyǵy haqynda, eki eldiń baýyrlastyǵyn erekshe atap ótti. Halyqaralyq Túrki mádenıeti men murasy qorynyń prezıdenti Aqtoty Raıymqulova jaryqqa shyǵyp otyrǵan jınaqtyń mańyzyna toqtaldy.
– Búgingi tańda uıymymyz Túrki mádenıetiniń muralaryn ilgeriletý boıynsha birqatar jobalardy iske asyryp jatyr. Túrki halyqtarynyń baı murasy men mádenıetin saqtaý, qorǵaý jáne jańǵyrtý bizdiń qorymyzdyń basty mıssııasy. Bıylǵy 25 qańtarda Ázerbaıjan Respýblıkasynyń prezıdenti, asa qurmetti Ilham Geıdaruly Álıev Muhamed Fızýlıdiń 530 jyldyǵyn toılaý týraly jarlyqqa qol qoıǵan bolatyn. Bul óz kezeginde Fızýlıdiń murasyn nasıhattaý barysyndaǵy jańa múmkindikterge jol ashady dep oılaımyn, – dedi Aqtoty Raıymqulova.
Rýhanı is-sharada Ázerbaıjan akterleri Gýseınaga Aslanova men Djaly Novrýz shaıyrdyń qazynaly jyrynan úzindi oqyp, kórermen júregine meıirim men úndestik dánin ekti.
Munan soń sóz alǵan belgili ádebıettanýshy, qalamger, Memlekettik syılyqtyń laýreaty Saýytbek Abdrahmanov Abaıdyń Fızýlı esimin Shyǵys aqyndarynyń ishinen alǵashqy bolyp atap, medet tilegenin tilge tıek etti. Sonymen qatar tuńǵysh klassıkalyq proza Ázerbaıjanda erte kezden qalyptasqany men qos halyqtyń mádenı birligi jóninde aıtty.
Sharada N.Gánjáýı atyndaǵy Ázerbaıjan ulttyq ǵylym akademııasynyń meńgerýshisi Farangız Azızova «Túrki álemindegi Fızýlı shyǵarmashylyǵynyń mánine» toqtalsa, aqyn kitabynyń keńesshisi, ádebıettanýshy Dıdar Qulkenov «Qazaqstandaǵy Fızýlı shyǵarmashylyǵynyń tanylýy» týrasynda jan-jaqty baıan etti.
Mádenı keshte Fızýlı jyrlary Ázerbaıjannyń tanymal aspaby mýgam arqyly sazdy áýenmen shyrqalyp, kórermender yqylasyna bólendi.
