Oblystyq polısııa departamentiniń málimetinshe, jyl basynan beri Qostanaı qalasynyń ózinde kámeletke tolmaǵandarǵa qatysty 1 200-ge jýyq quqyq buzý deregi tirkelgen. Tártip saqshylary bul keleńsiz oqıǵalardyń deni, ıaǵnı 83 paıyzy túngi ýaqytta tirkelgenin aıtyp otyr.
«Tún ortasynda janynda ne ata-anasy, ne zańmen bekitilgen qamqorshysy joq qaraýsyz júretin jasóspirimder kóbeıip ketti. Mundaı balalardyń kóbi túnde aǵa-ápkelerine nemese týystaryna erip júre berýge bolady dep oılaıdy. Alaıda kámeletke tolmaǵandardyń qaýipsizdigi men tártibin baqylaýdy qamtamasyz etý maqsatynda zań túngi ýaqytta balanyń qasynda zańdy ókildiń júrýin talap etedi», deıdi polısııa departamentiniń baspasóz hatshysy Karına Bazarbaeva.
Sonymen qatar túngi klýbtar men dámhanalarda, kompıýter ortalyqtary men kınoteatr tárizdi oıyn-saýyq oryndarynda beısaýat júrgen 77 bala tártip saqshylarynyń nazaryna ilikken. Soraqysy sol, bıyl mas kúıinde ustalǵan 58 jasóspirimniń birazy narkologııalyq dıspanserdiń, birazy polısııanyń esebine tirkelgen. Sondaı-aq bala tárbıesine durys qaramaǵan 83 ata-ana ákimshilik jaýapkershilikke tartylyp otyr.
«Jasóspirimder arasyndaǵy quqyq buzý faktileriniń jıilep ketýi kóbine otbasy tárbıesine baılanysty. Úıde «áı deıtin ájeniń, qoı deıtin qojanyń» joqtyǵyn sezingen bala bos júriske salynady, jaman ádetke úıir bolady. Mundaı jaıttardyń aldyn alý maqsatynda jylyna birneshe ret respýblıkalyq «Jasóspirim» jedel aldyn alý aksııasyn ótkizip turamyz. Atalǵan is-shara aıasynda mektepterdi aralap, balalarmen kezdesemiz. Túngi reıdterdi kúsheıtip, oıyn-saýyq oryndaryna baqylaýdy kúsheıtemiz. Sondaı-aq bizde tirkeýde turǵan jasóspirimderdiń úıine baryp, olardyń ata-analarymen balanyń minez-qulqy, oqý úlgerimi, bos ýaqytyn qalaı ótkizetini jóninde áńgimelesemiz», deıdi ıývenaldy polısııa mamandary.
Qostanaı oblysy
