Memleket basshysy Qasym-Jomart Toqaev «kitaphana isin damytýǵa beıjaı qaraýǵa bolmaıtynyn» basa aıtqan edi. Sol sebepti, qundy dúnıeler halyqqa qoljetimdi bolýyna kitap qory biryńǵaı sandyq formatqa kóshirilip jatyr. Kitaphana qorynda XVII ǵasyrdyń sońynan bastap jaryqqa shyqqan eki myńnan astam sırek kitap bar. Olar arnaıy qorda saqtalǵan. Jylyna munda 23 myńnan astam oqyrman tirkeletin kórinedi. Oqyrmandarynyń deni – jastar.
Torqaly toı basy «Qaraǵandy 09: erkin dıalog aımaǵy» halyqaralyq OpenTalk brıfıngimen bastaldy. Qazirgi zamanǵy kitaphanalyq qyzmettiń teorııalyq jáne praktıkalyq baǵyttaryn talqylaý, shetelden, elimizdiń basqa óńirinen kelgen kitaphana basshylarymen birge kitaphana jumysynyń kreatıvti ádistemeleri jáne tabysty tájirıbelerimen almasý, mýzeı men arhıvter arasyndaǵy yntymaqtastyq sekildi taqyryptar jan-jaqty talqylandy.
Alǵash sóz alǵan Mádenıet, arhıvter jáne qujattama basqarmasynyń basshysy Erkebulan Jumakenov ujymdy mereıtoıymen quttyqtady.
– Bul rýhanı orda oblysymyzdyń bas kitaphanasyna aınaldy. Jyldan-jylǵa kitaphana óz qyzmetin keńeıtip, áleýmettik-mádenı, aqparattyq jáne bilim berý ortalyǵy retinde damyp keledi. Bul mereke tek bizdiń óńirdiń mádenıeti ǵana emes, respýblıka úshin de mańyzdy jáne aıtýly data ekeni sózsiz, – dedi ol.
Saltanatty rásim kezinde Mádenıet jáne aqparat mınıstrliginiń Arhıv, qujattama jáne kitap isi komıteti Kitap isi basqarmasynyń basshysy Almaz Myrzahmet Mádenıet jáne aqparat mınıstri Aıda Balaevanyń quttyqtaý hatyn jetkizdi.
«Kitaphanashylardyń eńbegi eren! Oblystyq kitaphanashy quramynyń izdenisi men bastamasy, qajymas eńbegi – zor qurmetke laıyq. Kitaphana ujymyna tolaǵaı tabys, shyǵarmashylyq jetistik, baıandy bastama tileımiz. Oblystyń mádenı, tarıhı murasyn saqtaý jáne damytý jolyndaǵy eńbekterińiz jemisti bolsyn!» – delingen quttyqtaý hatta.
Almaz Myrzahmet oblys kitaphanalaryn damytý bóliminiń basshysy Aıgúl Qarashovaǵa «Mádenıet salasynyń úzdigi» tósbelgisin tabystady.
Ulttyq kitaphana dırektory, Qazaqstan Kitaphanalar odaǵynyń tóraǵasy Baqytjamal Ospanova ujym basshysy kitaphana dırektory Aınur Shaımuhanbetovany «Qazaqstannyń úzdik kitaphanashysy» tósbelgisimen marapattady. «Amanat» partııasynyń Qaraǵandy oblystyq fılıalynyń tóraǵasy Bekzat Altynbekov te arnaıy kelip, izgi tilegin bildirdi.
Qazaqstan Jazýshylar odaǵynyń tóraǵasy Mereke Qulkenovtiń quttyqtaý hatyn oblystyq fılıal tóraǵasy Janat Jańqashuly tabystady. Onda: «Qaraǵandynyń qarashańyraǵy atanǵan kitaphana – Arqa baspasynyń abyroıy, parasat tunǵan ordasy. Qala men dala tarıhynyń ár sáti kitapqa tańbalanyp, tasqa basylyp, qaǵazǵa kóship, kitaphanalar qyzmeti arqyly ǵasyrdan-ǵasyrǵa mıras bolyp saqtalyp keledi. Arqa óńiri sóz óneri sheberleriniń tańdaýly týyndylaryn «Saryarqa kitaphanasy» atty kóptomdyq serııasy aıasynda jaryqqa shyǵarýdy usynyp, oǵan qoldaý kórsetken eńbekterińiz úshin Alǵys bildiremin», delingen.
El-elden, jer-jerden kelgen kitap isi sarapshylarynyń baıandamalarynda qazirgi zamanǵy kitaphana qyzmeti, olardyń úzdiksiz damý ústinde ekeni jáne kitaphana oqyrmandary arasynda jastar qatary kóbeıgeni jóninde aıtyldy.
Munymen qosa, is-shara sheńberinde «Kitaphana – jańa qoǵamdyq keńistik» atty jańa kitaptyń tusaýkeseri ótti. Kitaphananyń 90 jyldyq mereıtoıyna oraı uıymdastyrylǵan «Jastardy kitaphanaǵa tartý» atty jobalar baıqaýynyń jáne «HackTheBookshelf» hakatonynyń jeńimpazdary marapattaldy. Kitaphanashylar pikirtalas alańdaryna, sheberlik saǵattaryna, dóńgelek ústelge qatysyp, tájirıbe almasty.
Kelesi kúni «Jańa dáýir ádebıeti: dástúr jáne jalǵastyq» atty dóńgelek ústel basynda oqyrmandy qazirgi ádebıettegi qandaı tendensııalar men kitaptar qyzyqtyratyny týraly usynys aıtyldy.
Jıynǵa qatysqan aqyn-jazýshylar sıfrlyq oqý dáýirinde «jazýshy – oqyrman» dıalogi qalaı damıtyny jaıynda óz oılaryn ortaǵa saldy. Odan bólek, kitaphana qorynda shetel ádebıetinen aýdarylǵan dúnıelerdiń azdyǵy da sóz boldy. Aýdarmashylardyń máselesi de osynda pysyqtaldy.
– Kitaphana ishinen qurylǵan «Jyr jaýhar» klýbyna da 20 jylǵa jýyqtady. Jastardyń bul klýby Qaraǵandy rýhanııatyna, shyǵarmashylyqqa zor yqpal etti. Qazir sol shyǵarmashylyq ortadan shyqqan jastar úlken qyzmet oryndarynda otyr. Jalpy, N.Gogol atyndaǵy oblystyq ámbebap ǵylymı kitaphanasyna daýylpaz aqyn Qasym Amanjolovtyń esimin berý qajet. Qaraǵandydaǵy keıinnen ashylǵan «Qasym úıinen» kitaphananyń fılıalyn ashý kerek, – degen usynysyn bildirdi Abaı atyndaǵy Memlekettik syılyqtyń laýreaty Serik Aqsuńqaruly.
Qaraǵandy oblystyq tarıhı-ólketaný mýzeıinde «Tarıh. Rýhanııat. Qoljazbalar murasy» atty pıtch-sessııa ótti. Munda Súleımanııa qoljazbalar kitaphanasynyń dırektory Hýseın Kýtan myrza XII–XV ǵasyrlardaǵy qoljazbalar saqtalǵan Súleımanııa qoljazbalar kitaphanasynyń qyzmetimen, Túrkııada qoljazbalyq murany zertteý jáne saqtaý jumysymen bólisti.
Odan keıin mártebeli meımandar kitaphanany aralady. Olarǵa sırek kezdesetin kitap qoryn kórsetildi. Sheteldik áriptestermen shyǵarmashylyq baılanysty nyǵaıtý maqsatynda ekijaqty memorandýmǵa qol qoıyldy.
– Qaraǵandy – tanymal qala. Osy jıynnyń aldynda Temirtaý qalasyndaǵy mýzeıge baryp qaıttyq. Tunyp turǵan tarıh. Al N.Gogol atyndaǵy oblystyq ámbebap kitaphanasy – Halyqaralyq dárejedegi kitaphana. Kitaphanaǵa kirseńiz, janyńyz jaı tabady eken. Aýrasy keremet. Ári qory da mol. Memorandým aıasynda tájirıbe almasyp, bar bilgenimizben bólisemiz. Dostyǵymyz odan ári nyǵaıa bersin, – dep tańdanys bildirdi Reseı jasóspirimder memlekettik kitaphanasynyń dırektory Irına Mıhnova.
Qaraǵandy oblysy
