Onyń Pelte elementiniń negizinde qurastyrǵan qondyrǵysy – ekologııalyq taza, kúndelikti ómirde qajetti, kez kelgen aımaqta, aýa raıynyń qolaısyz mezgilinde paıdalanýǵa laıyqtalǵan. Qys mezgilinde mobıldi qurylǵylar qýaty tez taýsylatyny, ásirese syrtta júrgende ony qýattaý qıynǵa túsetini – tanys jaǵdaı. Generatordy tabıǵı apat kezinde de qoldanýǵa bolady. О́ıtkeni osy qurylǵy janyp turǵan ottan da qýat alady.
Artýr alty jyldan beri «Zerde» ǵylymı jobalar baıqaýyna qatysyp, júldeli oryndarǵa ıe bolyp keledi. Badamsha mektep-bóbekjaı baqshasynyń fızıka páni muǵalimi –Alla Horolskaıa oqýshysynyń qabiletin der kezinde baıqap, baǵyttap júr. Jas ónertapqysh óz bolashaǵyn fızıka mamandyǵymen baılanystyryp, qorshaǵan ortaǵa zalal keltirmeıtin ǵylymı jańalyqtar ashýdy armandaıdy. «Zerde» jobasynan ózge saıystarda da baq synaǵan Artýr eki jyl buryn «Tabıǵatty qorǵaıyq» taqyrybynda beınerolıkter túsirýden oblysta birinshi oryn aldy.
Balanyń jetistikke jetýi eń aldymen ata-anasynyń qoldaýyna baılanysty ǵoı. «Artýrdyń ákesi Sergeı kishkentaı kezinen qurastyrýdy, sirińke qorabynan úıshikter men ushaq, keme, aǵashtan músinder jasaǵandy qatty unatqan. Ákesiniń osy qabileti Artýrǵa berilgen dep oılaımyn. Biz ulymyzdyń qandaı bastamasyna da qoldaý bildirip kelemiz. Artýr bala kezden jańany úırenýge, oıyndaǵysyn is júzine asyrýǵa óte qumar. Osy jaǵynan birtindep ómirlik daǵdysyn qalyptastyryp, naqty ǵylymdarǵa jaqyndap keledi», deıdi Artýrdyń anasy, Badamsha orta mektebiniń muǵalimi Mánshúk Qaıyrlyqyzy.
Talapty jas mýzykaǵa da áýes. Qazir ol Badamshadaǵy mýzyka mektebiniń akkordeon synybyna barady, óz betimen gıtarada oınaýdy úırenip aldy. Ol balamaly energııa jobasyna qatysyp, bolashaqta elge paıda ákeletin, tabıǵatqa zalal keltirmeıtin ınnovasııalyq jobalardy qolǵa alǵysy keledi.
Aqtóbe oblysy
