Tókken terdiń óteýi

Jalaǵash aýdanyndaǵy «Er-Áli» sharýa qojalyǵy 3 500 gektarǵa aýyl sharýashylyǵy daqyldaryn egipti. Sharýalar 1 300 gektarǵa egilgen kú­rish­tiń ár gektarynan qazir ortasha eseppen 89 sentnerden ónim alyp otyr.

Osy aýdandaǵy ozat sharýashy­lyqtyń biri «Tań LTD» JShS osy jyly 3 000 gektar jerge egin ekken. Seriktestik dıqandary myń jarym gektarlyq alqaptaǵy kúrishtiń ár gektarynan 85 sentnerden ónim alyp, kóp jyldan beri qol jetpegen tabysqa keneldi.

Alqapqa sebilgen kúrish dániniń basym bóligi sheteldik «Kaýrıs», «Lıder» jáne «Alıans» sorttary. Jańalyqty jatsynbaıtyn sha­rýa­shylyq 80 gektarǵa qant qu­maıyn, 800 gektarǵa jońyshqa, 150 gektarǵa túıejońyshqa egipti. Oblystyq Aýyl sharýashylyǵy jáne jer qatynastary basqarmasynyń málimetinshe, osy jyly 189 myń gektar jerge aýyl sharýashylyǵy daqyldary egilgen. Osynyń 85,6 myń gektary – kúrishtik alqaptar.

Sý tapshy bolǵanmen de memleket tarapynan kórsetilgen qoldaý nátıjesinde osy jyly dıqandar asa qınala qoıǵan joq. Eginin kútip-baptaǵan eńbekshi qaýym egin jınaý jumystaryna qajetti aýyl sharýa­shylyǵy tehnıkalarmen, janar-jaǵarmaımen, mıneraldy tyńaıt­qyshpen tolyq qamtamasyz etildi.

Oblystyq Aýyl sharýashylyǵy jáne jer qatynastary basqarma­synyń basshysy Talǵat Dúısebaevtyń aıtýyn­sha, búginde egilgen 85,6 myń gektar kú­rishtiń 27,7 myń gektary orylyp, 19,2 myń gektary bastyryldy. Oblys boıyn­sha egilgen ár gektardan ortasha esep­pen 49,6 sentnerden ónim alynyp otyr.

Sý tapshylyǵyna baılanysty «Tań LTD» JShS qytaılyq kompanııamen birlesip tamshylatyp sýarý ádisimen júgeri egýge kiristi. Bıyl osyndaı ádispen 800 gektarǵa júgeri ekken dıqandar jobanyń bolashaǵynan úmitti. «Er-Áli» sharýa qojalyǵy qolǵa alǵan 6 gektarlyq alma baǵy da tamshylatyp sýarylyp otyr.

Qyzylorda oblysy,

Jalaǵash aýdany