Bul joba Mádenıet jáne aqparat mınıstrliginiń qarjylyq qoldaýy aıasynda Shymkent qalasynda, Túrkistan, Qaraǵandy oblystarynda qanatqaqty negizde qolǵa alyndy. Muny «Qorǵan-M» qoǵamdyq birlestigi iske asyryp otyr.
Birlestik menedjeri Anna Malıýtına úsh óńirden 39 ótinim túskenin aıtady. Sonyń arqasynda Túrkistan oblysy boıynsha – 10, Qaraǵandy men Shymkent óńiri boıynsha 5 shaǵyn grant bólingen. Shaǵyn grant quny – 1 mln teńge. Bul qarjy múgedektigi bar azamattardy áleýmettendirý, jumyspen qamtý isine baǵyttalady. Birlestik jaqynda Qaraǵandy oblysyndaǵy jeńimpazdardy marapattady.
Shaǵyn granttyń ıgiligi bar. О́ńirimizdegi «О́mir syıla» qaıyrymdylyq qory – jeńimpazdardyń biri. Qordy qurǵan Marına Boshel bul qarajattyń úlken kómek bolatynyn aıtady. Qor eki jyldan beri quryltaıshylardyń qoldaýynyń arqasynda jumys istep kelgen. Sondyqtan bul – olardyń qol jetkizgen alǵashqy granty.
– Qor sút bezderi obyryna shaldyqqan áıelderge kómek beredi. Búginde 50-den astam adam bar. Memleket ol naýqastardyń bárine kómektesedi. Biraq adam emnen keıin ádette jalǵyz qalady. Biz árqaısysyna kómektesip, qamqorlyq, meıirim tanytamyz. Naýqastardy kásipkerlikke, tiginge úıretkimiz keledi, – deıdi Marına Boshel.
Jaqyn kúnderi Balqash qalasynda jańa ıppoterapııa ortalyǵy ashylady. Grantty utqan Merýert Qasymova qarajatyn sonda jumsaımyn deıdi.
– Meniń jeke kásibim jylqy ósirýmen baılanysty. Múmkindigim bar bolǵan soń, erekshe balalarǵa bir qaıyrymdylyq jasaıyn degen nıetpen osyndaı bastamany qolǵa aldym. Bastapqyda 2-3 balany qabyldap kóremin. Ippoterapııanyń oń áseri jóninde derek kóp. Grant qarajatyna arnaıy oryn, er-toqym alýdy josparlap otyrmyn, – deıdi grant jeńimpazy.
Jobaǵa usynylǵan bıznes jospardyń barlyǵynyń sapaly quralǵanyn oblys ákiminiń múgedektigi bar adamdar máseleleri jónindegi shtattan tys keńesshisi Nııaz Súndetalıev aıtyp otyr.
– О́ńirden 9 ótinim tústi. Konkýrstyq komıssııanyń múshesi retinde jeńimpazdy anyqtaǵanda usynylǵan jumystardyń mańyzdylyǵyna, qajettiligi men grant qarajatyn tıimdi paıdalana bilýine qaradyq. О́ıtkeni munda úlken jaýapkershilik bar, – deıdi ol.
Grant qarajatynyń tıimdi jumsalýyna tıisti baqylaý jasalady. Jeńimpazdar ár aı saıyn esep beredi. Onymen qosa, bıznes josparyn tórt aı merzim ishinde júzege asyrýy qajet. Muny qadaǵalaý – uıymdastyrýshylardyń tikeleı mindeti, jaýapkershiligi.
Jergilikti úkimettik emes uıymdar men bastamashyl toptardyń kómegimen múgedektigi bar adamdardyń ómir súrý sapasyn arttyrýǵa baǵyttalǵan jobaǵa aımaq aldyn ala júrgizilgen birqatar áleýmettik zertteý negizinde engen. Áýeli múgedektigi bar adamdardyń sany, olardyń basty máseleleri anyqtalyp, jete zerdelengen.
– Iri megapolısterde bul máseleniń sheshilýi jaqsy, al shalǵaı eldi mekenderde múmkindik múlde joq. Jumysqa ornalasý máselesine kelsek, jumys berýshi men jumysker arasyndaǵy qarym-qatynas tipti durys emes. Jumys berýshiler ondaı adamdardy jumysqa alǵysy kelmeıdi. Sondyqtan úkimettik emes uıymdardy tartý arqyly osy máseleni qoǵamǵa jetkizgimiz keledi, – deıdi birlestik basshysy.
Qaraǵandy oblysy
