Sýret: gov.kz
Buryn sot sheshimimen áreketke qabiletsiz dep tanylǵan on segiz jastan asqan azamattardyń qamqorshylary qujattardy qaǵaz túrinde jınap, arnaıy ótinimderdi rásimdeý úshin kezekke turatyn edi. Jańartylǵan qyzmet qajetti qujattardy onlaın tapsyrýǵa múmkindik berip, ýaqyt shyǵynyn edáýir qysqartady.
Endi qamqorshylar birinshi toptaǵy júrip-turýy qıyn múgedekterge jeke kómekshi qyzmetterin paıdalaný, olardy arnaıy júrip-turý quraldarymen qamtamasyz etý, estý qabileti nashar múgedekterge ymdaý tili mamanynyń qyzmetterin paıdalaný (jylyna alpys saǵat), úı jaǵdaıynda arnaıy áleýmettik qyzmetter alý, protezdik-ortopedııalyq kómekpen qamtamasyz etý, medısınalyq-áleýmettik mekemelerde (uıymdarda) arnaıy áleýmettik qyzmetter alý, múmkindigi shekteýli balalardy sanatorlyq-kýrorttyq emdeýmen qamtamasyz etý syndy memlekettik qyzmet túrlerine onlaın ótinim bere alady.
Qyzmetti alý úshin paıdalanýshyǵa eGov.kz portalynda tirkelip, «Áleýmettik qamsyzdandyrý» bólimine ótý qajet. Odan keıin «Múgedekterdi qoldaý» bóliminde usynylǵan tizimnen qajetti qyzmetti tańdaıdy. Sosyn ESQ (elektrondyq sıfrlyq qoltańba) arqyly qol qoıý qajet. Qyzmet nátıjesimen paıdalanýshy jeke kabınette («Qyzmetter alý tarıhy» bóliminde) tanysa alady.
Aıta keteıik, bul qyzmetti Eńbek jáne halyqty áleýmettik qorǵaý mınıstrligi Sıfrlyq damý, ınnovasııalar jáne aeroǵarysh ónerkásibi mınıstrligimen birlesip ázirledi.
