Sýret: ru.freepik.com
Joldaýda elimizdiń saıası jáne áleýmettik-ekonomıkalyq damý keleshegine qatysty máseleler baıandaldy. Ásirese meniń nazarymdy aýdartqany – azamattardyń tabysyn arttyrý jáne osy jolmen júrý úshin ádil qoǵam qurý. Atalǵan maqsatqa qol jetkizýge barlyq múmkindik bar. Memlekettik basqarý tıimdiligin, ádildigin jetildirý, zań ústemdigin joǵary deńgeıge kóterý óz nátıjesin beretini anyq.
Bir atap óterligi, el Prezıdenti bir baǵytqa basymdyq bermesten barlyǵyn teńdeı qamtyp, naqty jumystardy aıqyndady. Syrtqy jáne ishki saıasat, sondaı-aq áleýmettik-saıası bloktiń damýy da – basty nazarda. Iá, saıası qujatta kóptegen baǵyt boıynsha atqarylatyn mindetter alǵa qoıyldy. Kelesi jyl Jumysshy mamandyqtary jyly bolyp jarııalanǵany kópshiliktiń qoldaýyna ıe boldy. Áıtpese, keıingi jyldary túrli túıtkil elimizdegi qarapaıym jumysshylardyń tapshylyǵyn kórsetip berdi. Bul olqylyqtyń sheshimin tabý jolynda búkil el bolyp jastarymyzdyń bolashaq mamandyǵyn durys tańdaýyna yqpal etýimiz mańyzdy. Mamandyqtar jastar tarapynan qyzyǵýshylyq tanytatyn deńgeıde bolýǵa tıis.
Sondaı-aq Joldaýda bilim salasyna qatysty mańyzdy dúnıeler aıtyldy. Keıingi jyldary Prezıdentimizdiń bilim salasyn jaqsartýǵa, muǵalimderdi áleýmettik qoldaýǵa jiti kóńil bólip júrgeni qýantady. «Jaıly mektep» jobasymen zamanaýı talaptyń bárine jaýap beretin bilim oshaqtarynyń ashyla bastaýy – sózimizdiń aıǵaǵy. Endi balalarymyz sapaly bilim alyp qana qoımaı, ony odan ári damytýǵa da múmkindik almaq. Olardan erteńi elge qajetti bilikti mamandar shyǵatynyna senim mol.
Joldaýda aıtylǵan elimizdiń odan ári áleýmettik-ekonomıkalyq damýyna, aqsha-nesıe jáne salyq-bıýdjet saıasatynyń arasyndaǵy teńgerimsizdikti joıýǵa, ınvestısııalyq ahýal men bıznesti júrgizý jaǵdaılaryn jaqsartýǵa, ónerkásiptik áleýetti tolyq ashýǵa baǵyttalǵan birqatar bastamanyń orny bólek. Eldiń kadrlyq áleýetin arttyrý, ult densaýlyǵyn nyǵaıtý jáne azamattardy áleýmettik qoldaý júıesin qaıta iske qosý boıynsha keshendi sharalardy júzege asyrý máseleleri júıeli jalǵasyn tapqany abzal.
Joldaýda aıtylǵan barlyq bastama halqymyzdyń áleýmettik-ekonomıkalyq ál-aýqatyna baǵyttalǵanyn aıtqym keledi. Elimizdiń ár turǵyny jaıly ómir súrýge laıyqty.
Rabıǵa BERKENOVA,
Sh.Murtaza atyndaǵy Halyqaralyq Taraz ınnovasııalyq ınstıtýty,
Qazaq tili men ádebıeti kafedrasynyń meńgerýshisi,
fılologııa ǵylymdarynyń kandıdaty
