Jınalǵan qaýym aldynda sóz sóılegen Májilis tóraǵasy aldymen Prezıdent Qasym-Jomart Toqaevtyń quttyqtaýhatyn oqyp berdi.
«Ábish Kekilbaıuly – tól mádenıetimizdiń kókjıegin keńeıtip, jańa deńgeıge kótergen zańǵar jazýshy, klassık qalamger. Sóz zergeri erekshe daryny men telegeı-teńiz biliminiń arqasynda sheberliktiń shyńyna shyǵyp, teńdessiz týyndylar jazdy. Ábish Kekilbaıuly – táýelsizdigimizdiń tuǵyryn bekemdep, memlekettigimizdi nyǵaıtýǵa ólsheýsiz úles qosqan qaıratker. Ol joǵary laýazymdy qyzmetterdi abyroımen atqaryp, halqyna qaltqysyz qyzmet etti. Ult múddesin jáne el birligin qashanda bárinen bıik qoıdy. Ábish Kekilbaıulynyń otanshyldyǵy, parasaty, bilimpazdyǵy men eńbekqorlyǵy – óskeleń urpaqqa úlgi-ónege. Onyń tanymy tereń, talǵamy mol murasy áli talaı býynǵa rýhanı azyq bolary sózsiz. «Qazaq dalasynyń ár tasy – qaǵbam, ár butasy – sájdem» dep Otanyn sheksiz súıgen abyz Ábishtiń esimin el jadynda saqtaý – barshamyzdyń ortaq paryzymyz», delingen Memleket basshysynyń quttyqtaýhatynda.
Májilis spıkeri Ábish Kekilbaıulynyń 85 jyldyq mereıtoıy shyn máninde halyqtyń merekesi, ulttyń toıy ekenin atap ótip, Alash abyzynyń adamı bolmysyn, qaıratkerlik qyrlaryn eske aldy.
«Ábish Kekilbaıuly oqýlary – 2024» atty halyqaralyq ǵylymı-tájirıbelik konferensııaǵa Túrkııa, Majarstan, О́zbekstan, Qyrǵyzstan, Ázerbaıjan elderiniń ǵalymdary men otandyq zııaly qaýym ókilderi qatysty.
Sonymen qatar mereıtoıǵa arnalǵan «Ábish álemi» halyqaralyq teatr festıvali bastaldy.
