«Cassaq» mamandary ázirge arnaıy tapsyryspen ǵana kıim tigip otyr. Árkim talǵamyna qaraı keýdeshe, jeıde sekildi kıimderdi az ýaqytta tiktirip alady. Kásiporyn sannan buryn sapany alǵa qoıǵandyqtan, matanyń jaqsysyn tańdaıdy. Tipti Kóshpeliler oıyndarynda el namysyn qorǵaǵan sadaqshylarǵa etnostılde kıim tigip, sán-saltanatyn jarastyrǵan. Al osy istiń basy-qasynda júrgen seriktester – Aıaýjan Áshimova men Perızat Rahatqyzy. Aıaýjan ákimshilik máselelerge jaýap berse, dızaınerlik mamandyqty támamdaǵan Perızat kıim tigý syndy jumystarmen aınalysady. Seh mamandary ataýyna qaraı ulttyq naqyshtaǵy kıim ǵana emes, zamanǵa qaraı sándi kóılek-kónshektiń túr-túrin laıyqtap beredi. Bul jerdi seh emes, ónerdiń qaınaǵan ordasy dese de bolady.
Sýretti túsirgen – avtor
– О́zim dızaınerlik oqýdy támamdaǵan soń atele ashtym. Biraq oıymda úlken dúnıe jasaý júrgen edi. Sodan Aıaýjanmen tanysyp, kásipti qolǵa aldyq. Qazir ortaq ıdeıany júzege asyryp jatyrmyz. Kásip úlken bolǵan saıyn damýy baıaý júredi deıdi ǵoı. Alaıda bizdiń bıznes birden ózin aqtaı bastady, – deıdi kıim dızaıneri Perızat Rahatqyzy.
Ult múddesine eńbek etkisi kelgen olar eń áýeli seh ataýyn oılastyrǵan. Aqyldasa kele, «Qassaq» degen ataýǵa toqtalypty. Perızattyń aıtýynsha, shyǵysqa kelgen týrısterge Altaıdyń brendi ispetti jeıde, keýdeshe túrlerin usynǵylary keledi. Áıtpese, saıahatshylarǵa usynatyn bal men emdik shópten basqa kádesyılar joqtyń qasy.
– Qazir biz halyqqa ne keregin bilý úshin testik rejimde ártúrli talǵamǵa laıyq jumystardy qolǵa aldyq. Ýaqyt óte suryptalyp, kópshilik suranysyna ıe kıimderdi odan saıyn jetildiremiz. Ár aýdannyń brend kıimderin de oılastyryp jatyrmyz, – deıdi jas kásipker.
Ras, ár aýdannyń ózine saı kıimderi bolsa, týrısterdi sol qyzyqtyrýy múmkin. Máselen, Tarbaǵataı aýdanyna taý men arqardy kompozısııalap, jınaqy logotıp jasaǵan. Sony Tarbaǵataıdyń turǵyndaryna usynýdy jón kórip otyr. Turǵyndar ǵana emes, sol óńirge saıahattap barǵan meımandar da kádesyı retinde satyp alsa bolady. Logotıpterdi Erbolat Rahatuly esimdi jas maman jasap júr.
Ishki ıntereri oıýmen órnektelgen sehty aralaı júrip, Perızat Rahatqyzynyń shyǵarmashylyǵy týraly da suraǵanbyz. Aıtýynsha, dızaınerlik óner naǵashylarynan daryǵan. Bes balany jalǵyz ózi ósirip, jetkizgen naǵashy apasy aýyl-aımaqqa kórpe tigip, quraq qurap satqan.
– Bizde elikteý bar. Onyń jaqsy-jamanyn kim bilsin? Aıtpaǵym, 90-jyldary jastar reketke eliktese, keıin sheneýnik bolýdy maqsat qyldy. Qazirgi jastar bızneste jetistikke jetkisi keledi. Soǵan qýanamyn. Josparlarymyz oıdaǵydaı júzege asyp jatsa, jumysshy mamandyqtary arasynda túrli baıqaý uıymdastyrsaq deımin. Armanymyz kóp. Onyń bárin ýaqyt kórsetedi. Jalpy, ne istesek te ult úshin degen ustanym bar, – deıdi Perızat.
Joba-josparlaryn ashyp aıtpady. Durys ta. «Úlken isti úndemeı tyndyrar bol» degendeı, ispen dáleldeýdi jón sanaıdy. Ashyp aıtqan bir oıy – eski kıimderdi qabyldap, ony kádege jaratý. Buǵan deıin jaramsyz djınsy kıimderden túrli sómke tigip, satqan. Suranys óte joǵary kórinedi.
Kásiporyn seriktesi Aıaýjan Áshimova sehtyń áli de keńeıe túsetinin aıtady.
– Kásipti bastamas buryn kózin tabý – jumystyń bitkeni. Biz joba jasap jatqanda-aq tigin sehynyń bolashaǵy baryna kóz jetkizdik. Keıin qujattardy jınastyryp, «Damý» qorynan qoldaý aldyq. Olar bergen 15 mln teńgege qosymsha qarjy qosyp, ǵımaratqa qol jetkizdik. Qural-jabdyqtardy túgendep, shıkizat materıaldaryn aldyq, – deıdi Aıaýjan Áshimova.
Mundaǵy jumys istep otyrǵan eki tiginshi – kúmis jastaǵy aq jaýlyqty analar. Bilikti de bilimdi tiginshiler kúndelikti jumyspen qatar tájirıbeden ótetin stýdentterdiń de daǵdysyn shyńdap, jol kórsetip júredi.
О́SKEMEN
