Qanat Estaıuly eń aldymen 10 myń basqa arnalǵan mal sharýashylyǵy keshenin qurýdy oılastyryp, bıznes-joba jasady. Esepteı kelgende joba quny 1 417,3 mln teńge bolyp shyqty. Mundaı qarajat taptyra qoıa ma? О́z qaltasynan 744 mln teńge tabyldy. Jetpeı turǵanyna «Agrobıznes» baǵdarlamasy arqyly beriletin jeńildetilgen nesıe kómektesti. Sóıtip, jumys bastalyp ketti. Bul 2021 jyl bolatyn.
«Jobanyń alǵashqy kezeńinde kásipker qoı ustaýǵa qajetti 3 baz, 2 000 qara malǵa arnalǵan bordaqylaý alańyn saldy. Sonymen qatar, satyp alý arqyly mal basyn da kóbeıtti. Osylaısha, bolashaq et kombınatynyń negizi qalandy», deıdi Jańaarqa aýdany kásipkerlik jáne ónerkásip bóliminiń bas mamany Ardaq Alpysov.
Jýyrda ǵana kombınat iske qosyldy. Ashylý saltanatyna oblys ákiminiń orynbasary J.Nópirov qatysty.
«Bul – bizdiń oblystaǵy eń alǵashqy et kombınaty. Osyndaı irgeli jobany qolǵa alyp, iske asyrǵan kásipkerge alǵys aıtamyz. Alǵashqy kombınat basqa da kásipkerlerge tamasha úlgi bolýǵa tıisti. О́ıtkeni oblysta mundaı múmkindik mol. Tek ynta men jiger bolsyn», dedi.
Kombınattyń óz zerthanasy, konserv, soıý jáne ishek-qaryn arshý sehtary, muzdatqysh, tońazytqysh kameralary, ónim saqtaý qoımalary, teri saqtaıtyn orny bar.
«Jylyna 230 tonna et ónimderin óndirýdi maqsat etip qoıdyq. Bir aýysymda 3 myń bank konserv shyǵaramyz. Biz jylqy, sıyr, qoı etterin paıdalanamyz. Munda et konservilerimen qosa tushpara, manty, kotlet sekildi jartylaı fabrıkattyq ónimder de shyǵarylady. О́nimderimizdi Ulytaý oblysyna qosa, kórshiles Qaraǵandy oblysyna da shyǵaryp, satamyz. Oblys basshylyǵy Jezqazǵan qalasynan ashylatyn áleýmettik dúkenderden arnaıy oryn bólgeli otyr», dedi bizben áńgimesinde «Uly dala Co» JShS dırektory Jambyl Júndibaev.
Bir súısinerligi, munda jumyskerlerge jaqsy jaǵdaı ábden oılastyrylǵan. 4 gektar jerdi alyp jatqan kombınat aýmaǵynda arnaıy jataqhana, ashana jáne qonaq bólmeleri bar. Ázirge kombınatta 20 adam eńbek etip jatyr.
Kásipker jumys aýqymyn ulǵaıtý, ónim túrlerin kóbeıtý sekildi sharýalardy birtindep júze asyrýdy kózdeıdi. Bul kombınattyń ashylýy jaqyn aýyldardaǵy mal ıelerine de ońtaıly bolǵaly tur. О́ıtkeni kombınat óndiristi ulǵaıtqan kezde etti aýyldardan da qabyldaı bastaıdy.
Ulytaý oblysy,
Jańaarqa aýdany
