Reıtıngte úzdikter qatarynda

Saraptamalyq ortalyqtar­dyń 2014 jylǵa arnalǵan álem­dik ındeks-reıtıngisinde Qazaqstan Prezıdenti janyn­daǵy Strategııalyq zertteýler ınstıtýty (QSZI) Kavkaz, Ortalyq jáne Ońtústik Azııa elderi ortalyqtarynyń arasynda úzdik úshtikke enip otyr. Sondaı-aq, energetıka jáne shıkizat saıasaty salasyndaǵy álemdik saraptamalyq ortalyqtar arasynda alǵashqy otyzdyqtan kórindi. Olardyń arasynda REND korporeıshn (5-oryn), Amerıka Strategııalyq jáne halyqaralyq zertteýler ortalyǵy – CSIS (11-oryn), Brıtanııanyń energetıkalyq qaýipsizdik máseleler jónindegi zertteý ortalyǵy  – EUCERS (18-oryn) sııaqty saraptamalyq qurylymdar bar. Atalǵan reıtıng Pensılvanııa ýnıversıtetiniń «Saraptamalyq ortalyqtar jáne azamattyq qoǵam» atty zertteý baǵdar­lamasy aıasynda túziledi. Saraptamalyq qurylymdardyń jetistikterine qaraı baǵalaý 1989 jyldan beri júrgizilip keledi. Zertteýge álemniń barlyq óńirinen 6500-den asa «aqyl-oı» ortalyqtary alynady. Endi 2014 jyldyń reıtıngi men atalymdary qandaı krıterııler negizinde túzilgenine toqtalaıyq: - ǵylymı-saraptamalyq jumystar­dyń sapasy men bedeli – joǵary sapaly, obektıvti, saıası zertteýler. Jáne onyń memleket basshylyǵyna, BAQ pen qoǵamǵa qoljetimdiligi; - ortalyq qyzmetkerleriniń kásibı­ligi men abyroıy – biliktiligi joǵary, tájirıbeli ǵalymdar men sarapshylardy jınaýy, zertteýler salasyna moıyndalǵan mamandardy tartýy; - júrgizilgen zertteýlerdiń ǵylymı obek­tıvtiligi, ortalyqtyń ǵalymdary men sarap­shylarynyń resmı attestasııasy, ǵylymı jarııalanymdardyń sapasy men túrleri – kitap, jýrnal, konferensııalar materıaldary, ǵylymı jáne kásibı is-sharalardaǵy baıan­damalardyń, ortalyq mamandary jazǵan ǵylymı maqalalardyń sany; - naqty baǵdarlamalarǵa, brıfıngter men resmı kezdesýlerdiń sanyna, saıası materıaldardyń shyǵýyna baılanysty tanymaldyǵy; - zertteýlerdiń nátıjesin taratý maq­satynda elektrondy jáne dástúrli aqparat quraldaryn paıdalana bilý men negizgi aýdıtorııamen baılanys ornatýy. QSZI Elbasynyń Jarlyǵymen 1993 jyldyń 16 maýsymynda ashylǵan. Instı­týttyń qurylǵan sátinen bergi negizgi mindeti memlekettik ǵylymı-zertteý mekemesi retinde Qazaqstan Prezıdentiniń jumysyn ǵylymı-saraptamalyq turǵyda qamtamasyz etý bolyp tabylady. «Egemen-aqparat».