Match asa tartysty ótti. 2021 jylǵy álem chempıonatynyń jartylaı fınaly kóz aldymyzda qaıyra kólbeńdedi. Lıtvada ótken álemdik dodada portýgaldyqtar penaltı serııasynda bizdiń jigitterdi qapy qaldyryp, fınalǵa shyqty. Argentına quramasyn 2:1 esebimen utyp, álem chempıony atanǵan edi. Jeńilistiń kermek dámi qalaı bolaryn qarsylasqa bizdiń jigitter bul joly dáleldedi. Sóz joq, Portýgalııa quramasy – álemdegi teńdessiz ujymnyń biri. Matchtyń ón boıynda alańdaǵy basymdyqtyń tizginin ýysynda ustaýǵa umtyldy. Biraq Shyńǵys Esenamanovtyń (11-mınýt) buryshtamadan jetken dopty shirene tartyp esep ashýy olardyń kádimgideı eseńgiretip tastady. Tipti birinshi taım bizdiń jigitterdiń basymdyǵymen aıaqtaldy.
Úzilisten shırap shyqqan Portýgalııa oıynshylary standartty shabýyldy golǵa ulastyryp, esepti teńestirip, 21-mınýtta Isakýel Zıkı Te enshisine gol jazdy. Ekinshi taımnyń ýaqyty sát sanap kemip, sońǵy mınýty syrǵyp jatqan. Tartys dál osylaı órbip, ekstra taımǵa ulassa, odan keıin penaltı serııasyna jalǵassa, úsh jyl burynǵy ketken esemizdi qaıyra jiberip alamyz ba degen kúdikti oıǵa berilgenimiz ras. Biraq eldiń senimin arqalap shyqqan serkeler kemel oıynnyń keremetin kórsetti. Negizgi ýaqyttyń bitýine 18 sekýnd qalǵanda buryshtamadan komandalastaryn izdegen Dáýren Tursaǵulov Dýglasqa pas berdi. Ol oń qaptaldan jetken Arnold Knaýftyń aldyna salyp berdi. Tý syrtyna kelgen dopty oń aıaǵyna ıkemdep aldy da qaqpany kózdeı shirene tartty. Mendoka Erık esh qaıran kórsete alǵan joq. Bul sátte Dáýren Tursaǵulov Portýgalııa qaqpasynyń aldyna kelip úlgerdi de, Joaý Matýshtyń aıaǵyna da irkilmeı jer baýyrlaı jetken dopty qaqpashynyń keýdesinen asyra túrte saldy. Esep – 1:2.
Odan keıingi matchtyń sońǵy 3 sekýndy bizge «ǵasyrdan da uzaq kúndeı» boldy. Buryshtamadan óristetken shabýyl kezinde bizdiń oıynshylar ereje buzdy degen portýgaldyqtardyń shaǵymynan keıin ekranǵa úńilip, arpalysty sátti qaıta súzgen tóreshiler kiltıpan tapqan joq.
Biz bul matchtan neni kórdik? Ujymnyń yntymaǵyn, quramanyń quryshtaı qaıratyn sezindik. Paýlo Rıkardo Kaka bas bapker bastaǵan, kapıtan Igıta, Dýglas syndy brazılııalyq sańlaqtardyń sapyna qosylyp, sharbolattaı shyńdalǵan Shyńǵys Esenamanov, Dáýren Tursaǵulov, Birjan Orazov, Albert Aqbalyqov, Jahanger Ráshıt, Aqjol Dáribaı syndy talanttar shyqty. Mine, yntymaqty ujymnyń ólsheýsiz tókken teriniń óteýi.
Bas bapker Rıkardo Kaka matchtan keıin pikir bildirdi. «Jigitterdiń budan buryn da mereıimizdi asyrǵan tabystary boldy. Biraq dál osyndaı áserge bólenbegen edim. Oıynnan keıin jigitterge jeńistiń dámin sezinip, merekeleý kerek, biraq bul bastamasy ǵana degendi aıttym. Alda áli mańyzdy matchtar bar. Endi 30 qyrkúıekte ótetin shırek fınalǵa tyńǵylyqty ázirlenemiz. Bul jeńis bizdiń jankúıerler ǵana emes, О́zbekstanǵa arnaıy kelip qoldaý kórsetken ózge elderdiń kórermenderiniń de jeńisi», dedi bas bapker.
Ulttyq quramanyń qorǵaýshysy Shyńǵys Esenamanov: «Jeńistiń áserin áli tolyq sezine almaı jatyrmyz. Biz aqyryna deıin tartysyp, jeńiske jetýge degen senimdi bir sát te joǵaltpadyq. Bul – komandalyq oıyn bolǵandyqtan, ujymdyq yntymaqpen jeńiske jettik», dedi.
