Budan bylaı G.Golovkın halyqaralyq federasııanyń mártebesin nyǵaıtý maqsatynda atqarylatyn jumystardyń ashyq júrgizilýine, halyqaralyq sporttyq uıymdarmen qanattasa jumys atqarýǵa kúsh salady. Komıssııa basshysyna júktelgen negizgi mindet – bokstyń Olımpıada baǵdarlamasynan syzylyp qalmaýyna kúsh salyp, Halyqaralyq Olımpıada komıteti men World Boxing arasyna altyn kópir ornatý.
«Elimizge, barsha sport álemine boksty olımpıadalyq sport túri terinde saqtap qalý mańyzdy, bul meniń qyzmetimdegi eń basty basymdyq bolmaq. Boks sporty olımpıadalyq qundylyqtarǵa saı ádil ári ashyq bolýy maqsatynda Halyqaralyq Olımpıada komıtetimen tyǵyz áriptestik ornatýdy kózdep otyrmyn. Meniń kásibı sportshy retinde jıǵan tájirıbem uıym jumysyn bir júıege keltirerine senemin, kúshimizdi biriktire otyryp bokstyń damýyna jańa serpin beremiz. Oǵan jetý jolynda atqaratyn sharýa shash etekten», dedi Gennadıı Golovkın.
World Boxing prezıdenti G.Golovkınmen tize qosyp jumys isteý keleshektiń enshisindegi jobalardyń júzege asýyna serpin beretinin aıtady. «Áýesqoı boksta jazǵy Olımpıadanyń kúmis medalin, álem chempıonatynyń altyn júldesin alǵan, kásipqoı boksta da dúnıe júziniń úzdigi atanǵan mamannyń bokstyń Olımpıada baǵdarlamasynda qalýyna qosar úlesi orasan. Tórt jyldyq dodasynda bokstyń bolýy áýesqoılarǵa, kásipqoı boksty óristeýge tyń serpin beredi. Osy sport túrin damytý jolynda birlese jumys atqaratyn shaqty asyǵa kútemiz», dedi Borıs van der Vorst.
Byltyr sáýirde Halyqaralyq boks federasııasy quryldy. Búginge deıin álemniń 44 memleketiniń boks federasııalary múshelikke ótti. Qazaqstan boks federasııasy da World Boxing qataryna ótýge ótinish berdi. Federasııa prezıdenti Shahmurat Mútálip: «Búgingi kúnde bokstyń jazǵy Olımpıada baǵdarlamasynan alynyp qalmaýy máselesi HOK-tiń kún tártibinde tur. Boksty órkendetip, Olımpııa oıyndarynyń baǵdarlamasynda qalýy jolynda barlyq eldermen bilese jumys atqarýǵa esigimiz ashyq. Mundaı qadamǵa barýymyz elimizde boksty damyta túsýge múmkindik týdyrady. World Boxing Olımpıadalyq komıssııasynyń tóraǵasy, Ulttyq Olımpıada komıtetiniń prezıdenti Gennadıı Golovkınmen kezdesý barysynda otandyq boksty órkendetý jaıyn talqyladyq», dedi.
