Kórinbeıtin maıdan jaýynger-dárigeri eki myńnan astam ota jasaǵan

Kórinbeıtin maıdannyń jaýyngerleri áskerı hırýrgterdiń kúrdeli mindetterdi oryndaıtyny sózsiz. Ondaı otashylar ondaǵan Otan qorǵaýshylarǵa em jasap, olardyń ómirin saqtap qalady. «Dárigerdiń, onyń ishinde hırýrgtiń jumysy psıhologııalyq, fızıkalyq kúshti, tózimdilikti talap etedi. Mysaly, adam taǵdyry qyl ústinde turǵan kezde hırýrgke ony qutqaryp qalý úshin 8-10 saǵattyq ota jasaýǵa týra keledi», – deıdi Bas áskerı klınıkalyq gospıtal bastyǵynyń ǵylymı-hırýrgııalyq qyzmet jónindegi orynbasary, jetekshi hırýrg podpolkovnık Erjan Smaıyl. Áskerı hırýrgterdiń jumysy bir ǵana qalamen shektelip qal­maıdy, qajet bolǵan jaǵdaıda brı­gadalar Qazaqstannyń eń qashyq degen óńirine de barýǵa daıyn. «Birde biz jedel shaqyrýmen batysqa bardyq. Sol jerge jetkende bir adam úshin tutas bir dárigerlik brıgadanyń osynsha qashyqtyqtan ushyp kelgenine tań qalǵan bolatyn. Nátıjesinde, biz sol jerde eki ota jasadyq. Sosyn bir pasıentti Astanaǵa jetkizdik. Sol jerde taǵy bir pasıentke eki kúrdeli ota jasap, nátıjesinde onyń ómirin saqtap qaldyq», – deıdi podpolkovnık. Osy oqıǵadan soń ol «Jaýyngerlik erligi úshin» medalimen marapattalypty. Áskerı dárigerdiń qyzmet jyldarynda bul sııaqty oqıǵalar az kezdesken joq. E.Smaıyl: «Ás­ke­rı dárigerlerdiń jumysy, eń al­dymen, Otan qorǵaýshylarǵa arnal­ǵanyn, alda-jalda baqytsyz jaǵ­daı oryn ala qalsa, olarǵa áske­rı dárigerlerdiń kómekke kele­tinin, olardy qutqarý úshin dári­ger­lerdiń qoldan kelgenniń bárin jasaıtynyna senimdi bolýlary kerek», deıdi. Aıgúl Seıilova, «Egemen Qazaqstan».