ASTANA. 15 maýsym. Qyzylorda oblysy Qazaly aýdanynda memleket jáne qoǵam qaıratkeri Eleý Kósherbaevty eske alýǵa arnalǵan jasóspirimder arasynda grek-rım kúresinen H-dástúrli respýblıkalyq týrnır ótti. Bul týraly egemen.kz habarlady.
Eki kúnge sozylǵan týrnırge Reseı, Qyrǵystan, О́zbekstan jáne Qazaqstannyń 8 oblysynan komandalar qatysty.
Aıta keteıik, bılyǵy týrnırdiń ereksheligi boz kilemde beldesetin palýandardyń sany 300 jetip otyr. Sharanyń ashylý saltanatyna aýdan ákimi Baqyt Jahanov qatysyp, jarysqa qatysýshylarǵa sáttilik tiledi. Sondaı-aq, týrnırdiń bas demeýshisi «KazGerMunaı» jaýapkershiligi shekteýli seriktestigi birikken kásiporny bas dırektorynyń orynbasary Aıtbaı Kósherbaıuly men oblysynyń dene shynyqtyrý jáne sport basqarmasynyń basshysy Sadyq Mustafaev memleket jáne qoǵam qaıratkeri Eleý Kósherbaev jaıly estelik aıtyp, sportshylarǵa izgi lebizin bildirdi.
Sonymen, týrnırdiń birinshi kúngi nátıjesinde 1998-2000 jyly týǵan jasóspirimder arasyndaǵy 42 kg. salmaqta I oryndy Ońtústik Qazaqstan oblysynyń palýany Rsalıev Rahymjan jeńip alsa, 50 kg. salmaqta I oryn Qyrǵystan Respýblıkasynan kelgen Asıkeev Marlenge buıyrdy. Al 58 kg. salmaqta I oryndy Áıteke bı kentiniń jas palýany Saǵymbaev Rahat, 69 kg. salmaqta I oryn Shalqar qalasynyń sportshysy Aıshýkenov Janadil, 85 kg. salmaqta I oryndy Dosybaev Dáýlet jeńip aldy. Sondaı-aq, 63, 76, 100 salmaq dárejesindegi úzdikter de arnaıy dıplommen marapattalyp, uıymdastyrýshylar atynan baǵaly syılyqtar tabys etildi.
Talǵat Raıymbek.
Derek, sýret: egemen.kz.
