Bıyl úzdik nátıje kórsetken elimiz komandasynyń quramynda Almaty qalasynyń fızıka-matematıka baǵytyndaǵy Nazarbaev zııatkerlik mektebiniń oqýshylary Erdáýlet Túrgenbaev, Álfııa Baıjaqyp, Nurjan Kókeev, Dosjan Daıran jáne Qadylbek Dastan bar. Jetekshileri – Nurdáýlet Dosmaǵambet pen Dýlat Baıtúlenov.
«Buǵan deıin atalǵan saıystan birde-bir memleket eki dúrkin jeńimpaz atanǵan emes, al bizdiń oqýshylarymyz úshinshi jyl qatarynan jeńis tuǵyrynan kórindi. Osy tusta astyn syzyp aıtqanymyz jón, ár jarysqa únemi jańa oıynshy attanyp otyrady, ıaǵnı bir oqýshy eki ret qatyspaıdy. Olar saıystyń ulttyq kezeńinde irikteledi. Balalar álemdik dodaǵa bir jarym aı qarqyndy daıyndalyp, kún saıyn robottyń jumysyn jetildirdi. Olımpıadada komanda azyq-túlik máselesin sheshýge baǵyttalǵan jobany usyndy», dedi «USTEM Foundation» qoǵamdyq qorynyń basshysy ári ulttyq quramanyń bapkeri Asylbek Myrzahmetov.
Elimiz 2022 jyly Jenevada, 2023 jyly Sıngapýrde jeńiske jetken edi. Ulttyq qurama Oqý-aǵartý mınıstrliginiń, «Daryn» respýblıkalyq ǵylymı-praktıkalyq ortalyǵynyń, sondaı-aq Almaty qalasy ákimdiginiń qoldaýymen ótken robottehnıkadan irikteý kezeńderinde quryldy.
