- Japonııanyń Saıtama qalasynda aralas jekpe-jekten uıymdastyrylǵan Rizin-48 týrnırinde qazaq faıteri Qarshyǵa Dáýitbek jergilikti sportshy Takeakı Kınoshıtýdy birinshi raýndta-aq uryp jyqty. Osylaısha, Almatyda irgetasy qalanǵan «Alash Praıd» klýbynyń múshesi óziniń on altynshy kezdesýinde jeńiske jetti.
- Astanada Qazaqstan Ulttyq olımpıada komıtetiniń (UOK) Bas Assambleıasynyń kezekten tys jıyny ótti. Bul sharaǵa UOK prezıdenti Gennadıı Golovkın, Sport jáne týrızm vıse-mınıstri Serik Jarasbaev, olımpııalyq sport túrlerinen 33 respýblıkalyq federasııanyń ókilderi qatysty. G.Golovkın sportshylardyń Parıj Olımpıadasyndaǵy jetistikterine toqtalyp, 2028 jyly Los-Andjeleste alaýy tutanatyn jazǵy oıyndarǵa daıyndyqty qazirden bastaý kerektigine basa nazar aýdardy.
- Ázerbaıjannyń bas shahary – Bakýde kásipqoı bokstan «IBA Chempıondar túni» dep atalatyn týrnır ótti. Bul jarysta elimizdiń jankúıerleri asa aýyr salmaqtaǵy Nursultan Amanjolov (7-2, 6 KO) pen Magomedrasýl Medjıdovtiń (3-1, 3 KO) aıqasyn taǵatsyzdana kútti. Rıng qojaıynynyń London Olımpıadasy men Eýropa oıyndarynyń qola júldegeri, úsh dúrkin álem chempıony, qurlyq birinshiliginiń jeńimpazy degen ataqtary bar. 2013 jyly Almatyda ótken dúnıejúzilik dodanyń fınalynda Magomedrasýl bizdiń Ivan Dychkony aýyr nokaýtqa jibergen edi. Bakýdegi básekede Medjıdov tóreshilerdiń sheshimimen jeńis toıyn toılady.
- Fýtzaldan Almatynyń «Qaıraty» Qytaıdaǵy halyqaralyq týrnırge qatysty. Bul joly jerlesterimiz óz jankúıerlerin qýanta almady. Alǵashqy matchta «Shenchjen Nanlıngten» (4:7) utylǵan «Qaırat» kelesi kezdesýde Japonııanyń «Shınagavasyn» (6:4) utty. Biraq úshinshi oıynda Taılandtyń «Black Pearl» klýbyna (3:4) jol berdi.
- «Aqtóbe» fýtbol klýby el kýboginiń ıegeri atandy. Almatydaǵy Ortalyq stadıonda ótken fınaldyq saıysta olar «Atyraýdy» 2:1 esebimen eńserdi. Sóıtip atalǵan jarysta aqtóbelikter ekinshi márte top jardy. Alǵash ret olar osydan 16 jyl buryn el kýbogin ıemdengen.
- Taılandta voleıboldan áıelder arasyndaǵy Azııanyń klýbtyq chempıonaty aıaqtaldy. Petropavlovskiniń «Qýanyshy» jartylaı fınalda Vetnamnyń «Lp Bank Ninh Binh» klýbyna (1:3) ese jiberse, qola medal jolyndaǵy tartysta jergilikti «Nahon Ratchasımadan» (0:3) jeńildi.
- Elimizdiń 18 jastaǵy tennısshisi Sonıa Jıenbaeva Madrıdte shymyldyǵy túrilgen ITF týrnırinde top jardy. Jartylaı fınalda shveısarııalyq Djennı Derske (7:6, 6:2) shań qaptyrǵan ol aqtyq synda ulybrıtanııalyq Elıs Gıllandy (6:1, 5:7, 6:1) qapy qaldyrdy.
- Almatyda gandboldan Azııanyń klýbtyq chempıonaty óz máresine jetti. Bas júldege tartys elimizdiń qos komandasy – Qyzylordanyń «Qaısary» men Almatynyń «Dostyǵy» arasynda ótti. Bul saıys 45:23 esebimen Syr boıynan kelgen sulýlardyń paıdasyna sheshildi. Jarys qorytyndysynda Veronıka Hardına («Qaısar») eń úzdik oıynshy dep tanyldy.
