«Túsime ylǵı Myńbulaq kiredi» degen at qoıylyp, aıdar taǵylǵan keshke aqyndarmen birge ákimder de keldi. Erkin formatta, ashyq aspan astynda ótken ádebı is-sharada aqyndar jyr oqyp, ánshiler ánnen shashý shashty. Bir sózben aıtsaq, memorıaldyq-mýzeı úıdiń aýlasy da, aýrasy da jas talanttardyń tynysyn ashqan sekildi. Jýalynyń jupar aýasymen tynystaǵan olar shabyttanyp ketti.
Is-shara Júnis Álimbekov, Ábıirbek Tinálıev bastaǵan óńirlik teatr tarlandarynyń «Sher-Han» atty qoıylymynyń úzindisimen bastaldy. Keshke jınalǵandar mýzeı-úıdiń aýlasynda alaý jaǵyp, qabyrǵaly qalamger shyǵarmashylyǵy týraly áńgime órbitýdi de umyt qaldyrǵan joq. Aqyndar Sheraǵa rýhyna arnalǵan otty jyrlaryn oqyp, shyndyqtyń shyraqshysyna aınalǵan qalamger rýhyna taǵzym etti.
«Ulý jyly elimizge úlken synaqtar alyp kelgeni málim. Jyl basynan beri qazaq eli túrli qıyndyqty jumylǵan judyryqtaı eńserip kele jatyr. Munyń bári birlik pen berekeli tirliktiń arqasynda múmkin bolyp turǵany anyq. Qandaı qysyltaıań ýaqyt aldymyzdan tosyp tursa da, ult rýhanııatyn qaperimizden shyǵarýǵa qaqymyz joq.
О́ńir týraly oı qozǵaǵanda Áýlıeata jeri qalamgerlerdiń ólkesi ekenin umytpaýymyz kerek. Munda talaı qabyrǵaly qalamgerdiń tabanynyń taby qalǵan. Oblystyń aty Jambyldyń esimin ıelengeniniń ózi kóp dúnıeden habar berip tur. О́ńirimizde qara óleńge ańsary aýǵan jas talanttar az emes. Poezııany janyna serik etken talanttardyń talpynysy, óleńge degen adaldyǵy kóńil qýantady. Biz sol jastardyń shyǵarmashylyq áleýetiniń artýyna qoldan kelgenshe qoldaý kórsetýge ázirmiz», dedi E.Qarashókeev kesh barysynda sóılegen sózinde.
Bul kúni Áýlıetadan jyraqtap ketken, qazirgi kezde elimizdiń ár qıyrynda eńbek etip júrgen aqyndardyń týǵan jerge degen saǵynyshyn da sezgendeı boldyq.
«Tirlikte mynaý tıyndaı qun qalmaǵanda,
Alty qazdaıyn aınalyp jyr qonbaǵanda.
Tarazǵa baryp qaıtaıyq osy kóktemde,
Aldaǵy kúzde tym bolmaǵanda»,
degen Oljas Sándibektiń óleńinen aqynnyń Tarazda ótken stýdenttik kúnderine degen saǵynyshtyń taby esip turǵandaı boldy.
«Qarsy alyp, shyǵaryp sap turar shahar,
Aq shahar, saǵym shahar, munar shahar.
Bári ótken, ótkenderdi kúzetemiz:
О́tpeıdi Taraz ǵana – biz ótemiz», dep bastalatyn aqyn Erlan Júnistiń «Ǵasyrlar táji» poemasynan oqyǵan úzindisinen tarıhy tereńde jatqan kóne shaharǵa degen sheksiz qurmet baıqaldy.
Ádebıettiń áńgimesi aıtylǵan kesh barysynda jergilikti jas aqyndar Hamıt Esaman, Nurjan Álish, Tursynbek Sultanbek, Nurjan Qadiráli, Álimjan Shóńgerbaı, Nursultan Rahymbaı, Ǵalııa Abylaı, Nazerke Ońǵar, Ǵaınıken Maraltaıqyzy bastap, ózge de talant ıeleri qoshtap, ádemi óleńderin oqydy.
О́ńir basshysy Erbol Qarashókeev ádebı keshke Almaty men Astanadan arnaıy kelgen Erlan Júnis pen Oljas Sándibekke rızashylyǵyn bildirip, qurmet kórsetti. Is-sharaǵa qatysqan ózge de jas aqyndarǵa estelik syılaqtar tabystaldy.
Biraz jyl buryn belgili aqyn Maraltaı Raıymbekulynyń bastamasymen Taraz tórinde «Túngi Taraz ǵazaldary» atty televızııalyq joba qolǵa alynǵan edi. Sol kezde jambyldyq jas aqyndar Áýlıeata jeriniń ár qıyrynda bas qosyp, alaý tutatyp otyryp, jalyndy jyrlaryn oqyp jatatyn. Sodan beri de biraz jyldyń júzi ótip, mundaı keshter saǵymǵa aınala bastaǵan...
О́ńir basshysy Erbol Qarashókeev umyt bola bastaǵan dástúrdi jańǵyrtyp otyr. Ákimniń aıtýynsha, bul úrdis toqtap qalmaıdy. Sheraǵańnyń qara shańyraǵynda jas qalamgerler jyl saıyn bas qosyp turady. Qoldaýǵa turarlyq bastama baıandy bolsyn deımiz.
Jambyl oblysy,
Jýaly aýdany,
Talapty aýyly
