Saltanatty is-sharanyń quttyqtaý sózin mýzeıdiń ǵylymı hatshysy Saıalbek Ǵızzatov jetkizdi. «Tileýjan Batanov jeke kórmesin «Sezim» dep ataýy tegin emes dep oılaımyn. О́ıtkeni áıgili ıspan sýretshisi Pablo Pıkasso «Naǵyz sýretshi kórgenin emes, sezingenin jazady», deıdi. Tileýjan aǵamyzdyń týyndylaryna kóńil kózimen nazar salý kerek. Sonda ǵana týyndynyń pálsapalyq máni ashylyp, kórýshiniń kóńiline sáýle túsiredi», dep izgi iltıpatyn bildirdi.
Iá, olaı aıtýy zańdy. Sebebi Tileýjan Batanov abstraksııalyq kompozısııalaryn ulttyq rámizge negizdep, oǵan fıgýratıvtik qubylys elementterin jıi qosady. Osy ádispen búgingi qoǵamnyń dramalyq jaǵdaıyn jaqsy beıneleıdi.
Týyndyger keskindememen qatar dekoratıvti jáne qoldanbaly ónerde óziniń qoltańbasyn qalyptastyra bilgen sheber. Ol týraly sýretshi, etnograf Qalıolla Ahmetjan bylaı dep pikir bildirdi: «О́tken ǵasyrdyń 80-jyldary bizdiń óner keńistigimizde úlken ózgeris boldy. Sol kezde keskindeme, suńǵat salasynda júrip jatqan izdenistermen birge qoldanbaly óner salasynyń jańa túrleri irgelene bastady. Sonyń ishinde keramıkamen jumys isteýdiń asyl arnasyn jasaǵan áriptesimiz – Tileýjan Batanov. Onyń bul saladaǵy úlken jemisti nátıjesi – portrettik beınelerdi keramıkada qashaı bilgeni edi. Sonyń arqasynda jas sýretshiler keramıkaǵa bet buryp, tutas mektep qalyptasyp keledi».
«Meniń týǵan jerim – Almaty oblysyndaǵy Kólsaı degen jer. Tabıǵaty tumsa, sulýlyǵy tańdaı qaqtyrarlyq. Kókpeńbek aspan, móp-móldir kól, aǵyp jatqan asaý ózen meniń sýretkerlik kózqarasymdy qalyptastyrǵan tabıǵat syılary edi», deıdi sýretshiniń ózi. Búginde sýretshi jeke shyǵarmashylyqpen qosa, ustazdyqpen de aınalysyp júr.
Ashylý saltanatynyń qorytyndy bóliminde Kórkem sýret akademııasynyń vıse-prezıdenti Asqar Ájibekuly áriptesi Tileýjan Batanovty beıneleý ónerine aıryqsha eńbek sińirgeni úshin Qurmet gramotasymen marapattady.
