Foto: Ashyq derekkóz
AES boıynsha referendým
6 qazan kúni Qazaqstanda respýblıkalyq referendým ótedi. Referendýmda el azamattary AES salý máselesi boıynsha sheshim qabyldaıdy. Qaı saılaý ýchaskesinde daýys beretinińizdi referendum.gov.kz saıtynan bile alasyz.
Medısına qyzmetkerleriniń jaýapkershiligin saqtandyrý
Qazan aıynan bastap elimizde dárigerlerdiń kásibı jaýapkershiligin saqtandyrý bastalady. Densaýlyq saqtaý mınıstri 24 shilde kúni tıisti buıryqqa qol qoıdy. Jańa erejege sáıkes, densaýlyq saqtaý sýbektileri medısına qyzmetkerleriniń kásibı jaýapkershiligin saqtandyrý shartyn jasaıdy.
Kollektorlardyń jumysy ózgeredi
1 qazannan bastap «Qazaqstan Respýblıkasynyń keıbir zańnamalyq aktilerine tólemderdi azaıtý máseleleri boıynsha ózgerister men tolyqtyrýlar engizý týraly» zańdy iske asyrý sheńberinde ázirlengen kollektorlyq agenttikterdiń jeke tulǵalardyń bereshegin retteý qaǵıdalary kúshine enedi.
Jedel járdem qyzmetine qatysty buıryq jobasyn talqylaý aıaqtalady
Qazaqstan azamattary 8 qazanǵa deıin Densaýlyq saqtaý mınıstriniń jańa buıryq jobasyna «maquldaımyn» nemese «qarsymyn» dep daýys bere alady. Túzetýlerge sáıkes, jedeldiktiń 4-sanatyndaǵy qońyraýlar túsken kezde, ıaǵnı naýqastyń ómiri men densaýlyǵyna tikeleı qaýip tónbegen jaǵdaılarda jedel járdem brıgadasy jumys kúnderi saǵat 8:00-den 18:00-ge deıin jáne senbi kúni túske deıin jumys isteıdi.
Poıyz bıletteri qymbattaıdy
1 qazannan bastap elimizde poıyz bıletteri qymbattaıdy. Aýa baptaǵyshy joq vagondardyń bıletterine ulttyq tasymaldaýshy 20%-ǵa deıin jeńildikter usynady. Tarıfterdiń kóterilýi qoldanystaǵy 140 baǵyttyń 62-sine áser etedi. Kólik mınıstrligi bul kólik parkin jańartý, kórsetiletin qyzmetti jaqsartý jáne qyzmetkerlerdiń jalaqysyn kóterý úshin qajet ekenin túsindirgen edi.
Jańa tarıf:
- «Talgo» poıyzdarynyń baǵasy - shamamen 19 493 teńge;
- Standart poıyzdardaǵy kýpe quny - 19 653 teńgeni;
- Plaskart – 12 871 teńgege;
- Qala mańyna qatynaıtyn poıyz bıletteri - 6314 teńge.
Bıznesti qoldaý
4 qazannan bastap bıznesti memlekettik qoldaýǵa qatysty jańa erejeler kúshine enedi. «Jeke kásipkerlikti memlekettik qoldaýdyń keıbir sharalary týraly» Úkimettiń tıisti qaýlysy 17 qyrkúıekte qabyldandy. Olardyń ishinde: kásipkerlik sýbektileri shyǵarǵan oblıgasııalar boıynsha kýpondyq mólsherlemeni sýbsıdııalaý erejeleri, nesıelerge/qarjylyq lızıngke kepildik berý erejeleri, shaǵyn kásipkerlik sýbektileriniń básekege qabilettiligin arttyrýǵa baǵyttalǵan «Básekege qabilettilik» ınvestısııalyq granttaryn berý erejeleri bar.
О́ńirlerde jylytý maýsymy bastalady
Shyǵys Qazaqstan, Pavlodar, Aqmola oblystary men Astana qalasynda jylý berý maýsymy bastalyp ketti. Endi 1 qazannan bastap Abaı, Aqtóbe jáne Qaraǵandy oblystarynda jylý beriledi.
Jańa mereke
2024 jyldyń qazan aıynan bastap el azamattary birden úsh jańa merekeni atap ótedi. 1 qazan – Joǵary bilim qyzmetkerleri kúni jáne Radıo kúni, 14 qazan – Standarttaý qyzmetkerleriniń kúni.
Demalys
Elektrondyq úkimet saıtyndaǵy aqparatqa sáıkes, 25 qazanda Qazaqstanda Respýblıka kúni toılanady. Bul kún jumaǵa sáıkes keletindikten, el azamattary úshin qosymsha bir kún demalys bolmaq.
Bes kúndik jumys aptasy boıynsha jumys isteıtin otandastarymyz úsh kún qatarynan demalady:
- 25 qazan, juma – Respýblıka kúni, resmı demalys;
- 26 qazan, senbi – ádettegi demalys;
- 27 qazan, jeksenbi – ádettegi demalys.
