Saıanyń «SSS» mektebi

«Erteń óskende horeograf bolamyn» degen oıǵa berik bekindi. Sóıtip, mektep bitirgen kezde mamandyq tańdaýda esh qınalǵan joq. Astana qalasyndaǵy Qazaq ulttyq horeografııa akade­mııa­syna oqýǵa tústi. Aradaǵy jyl­dar qalaı jyldam zymyrap óte shyqty deseńizshi. Ol qolyna dıp­lom alǵan soń kóp oılanyp jatpady. Týǵan jerge qyzmet etýdi paryz sanap, Jezqazǵanǵa jol tartty. Qazir S.Qojamqulov atyn­daǵy Jezqazǵan mýzykaly drama ­teat­rynda baletmeıs­ter bolyp eńbek etedi. Negizgi jumysynan qoly bosaǵanda jas qyzdardy bı ónerine tartýdy maqsat tutqan bıshi óziniń mektebin ashýdy uıǵardy. Bul oıyn ata-anasy da, ápkesi Samal da qoldady. «Damý» baǵdarlamasy boıynsha ǵımaratqa qol jetkizdi. Bul oıdaǵy armanǵa qol jetkizýdiń tek alǵashqy qadamy bolatyn.

«Bizge qural-jabdyqtar qajet boldy. Sondaı-aq meniń túsinigimde, bı – sulýlyqtyń rámizi. Munda bı úırenýge kelgender eń aldymen ózde­ri jattyǵatyn nysannyń áde­miligine súısine bilýi kerek. Sondyqtan bı zalyn kórkemdep, ádemilep, ıaǵnı ıntererin kózdiń jaýyn alatyndaı etip qoıý da kerek boldy. Sóıtip, Jezqazǵan qalasy ákiminiń «Táýelsizdik urpaqtary» dep atalatyn jas kásipkerlerge arnalǵan baıqaýyna qatysyp, grant ıegeri atandym», deıdi Saıa Sadyqova kásipkerlikke qalaı kelgeni haqynda.

Ol jýyrda saltanatty jaǵ­daıda «SSS» degen bı mektebin ashty. Saltanatty sharaǵa qala ákimi Q.Shaıjanov qatysty.

«Árbir kásipker, jańadan ashylǵan nysan qala­my­z­­­dyń ekonomıkasyna tam­­­shydaı bolsa da úles qosa­dy. Sondyqtan olardyń árqaı­sy­synyń jumys­taryna tek qana sáttilik tileımiz. Saıany da, Samaldy da «Maqpalda» júr­gen kezderinen bilemin. Endi olar­d­yń ózderi keıingi býyndy tárbıe­leýdi qolǵa alyp jatyr. Buǵan qalaı súıinbeske?» dedi ol. Árbir ákim jas kásip­ker­lerdi osylaısha qoldaı bilse, qandaı ǵanıbet.

Saıanyń «SSS» mektebinde qazirdiń ózinde 5 jańa jumys orny ashyldy. Keıin mekteptiń aıasy keńise, jumys oryndary da kóbeıe túsýi ábden múmkin. Bul jaǵyn ýaqyt enshisine qaldyra turalyq.

Qazir munda 40 jas qyz bı óneriniń álip­pesimen tanysýda.

«Mektepke tórt jastan bastap qabyldaımyz. Olar 7 jasqa deıin balalar horeografııasymen aınalysady. Budan soń úsh baǵyttyń, ıaǵnı klassıkalyq bıdi, baletti, sondaı-aq halyqtyq jáne zamanaýı horeografııany tańdaıtyn bolady. Bizdiń maqsat – bı ónerine umtylatyn jas óskinderdi kásibı turǵyda tár­bıeleý» degen Saıa bul iste ápke­si Samaldyń aqyl-keńesine, kóme­gine júginetinin jasyrmady.

«Samal Astana qalasyndaǵy Qazaq ulttyq óner ýnıver­sı­tetiniń túlegi, pedagog-magıstr. Sondyqtan onyń bilimi, tá­ji­rıbesi mol» deıdi Saıa janynda júrgen eń jaqyn ustazy týraly.

О́nerli bolý bar da, sol óner­di kásipke aınaldyrý bar. Munyń ekeýi de Saıanyń boıynan taby­lyp tur. О́zi – ónerli, ózi – kásip­ker. Kóp keshikpeı «SSS» mekte­bi­nen qanshama shákirtter bı ále­mine túlep ushatyn bolady. Demek onyń kásipkerlikpen birge ustaz­­dyq joly da bastalyp jatyr.

Jezqazǵan