Sýretti túsirgen – Elena Petrova
Qos mereıtoı – ulttyq teatrdyń 90 jyldyǵy men Ahmet Jubanov pen Latıf Hamıdı birigip jazǵan «Abaı» operasynyń 80 jyldyǵy tuspa-tus kelgen maýsym kórermenine naǵyz óner merekesin syılady. Ǵasyrǵa aıaq basqan teatr ǵımaratynyń aldyna qyzyl kilem tóselip, kirpııaz klassıkalyq ónerge qaltqysyz qyzmet etken ardagerlerdi kórermen tik turyp, qoshemetpen qarsy aldy. Marapat tek sahna sańlaqtaryn ǵana emes, shymyldyq syrtynda spektakl ázirleýge qatysatyn kostıým sehy, grım mamany, jaryq qoıýshy sııaqty teatrdyń «kózge kórinbeıtin» barlyq bóliminiń burynǵy qyzmetkerlerin tutas qamtydy.
KSRO Halyq ártisi jáne Memlekettik syılyqtyń laýreaty Bıbigúl Tólegenova, Qazaq KSR Halyq ártisi, Qazaq KSR Memlekettik syılyǵynyń laýreaty Raýshan Baıseıitova, Qazaqstan jáne Tatarstan halyq ártisi Nurjamal Úsenbaeva, opera jáne balettiń ózge de jarqyn ókilderi, almatylyq zııaly qaýym, Qazaqstandaǵy dıplomatııalyq elshilik qyzmetkerleri bul keshte qurmetti meımandar qatarynan kórindi.
«Abaı atyndaǵy ulttyq teatr ǵasyr aldyndaǵy jańa beleske qadam basty. Áne-mine degenshe, aldaǵy on jylda qara shańyraǵymyz alǵashqy júzjyldyq ǵumyryn túıindeıdi. Osymen 90 jylǵa núkte qoıylatyn tarıhı kúnde ardagerlerdiń basyn qosyp, eńbegine rahmet aıtyp, laıyqty qurmet kórsetý búgingi óskeleń urpaqtyń, óner ujymynyń birden-bir paryzy dep esepteımin. Nege deseńiz, adam eńbegi birinshi kezekte ujym tarapynan, odan ári qaraı qoǵam, memleket tarapynan baǵalanyp turǵany mańyzdy. Bul ásirese óner adamyn shabyttandyrý úshin asa qajet, sondyqtan Abaı atyndaǵy teatrda jańa úrdis – óz qyzmetkerleriniń eńbegin jyl saıyn atap ótetin ádemi dástúr jalǵasyn taba beredi», dedi Abaı atyndaǵy QazUOBT dırektory Aınur Kópbasarova.
Teatr ardagerlerin marapattaý saltanatynda asyldyń tuıaǵy Raýshan Hatııatqyzy anasynyń asa baǵaly portreti men kezinde Kúlásh Baıseıitovanyń spektaklderde kıgen birneshe bas kıimin óner ordasynyń murajaıyna syılady. Qazaq KSR eńbek sińirgen óner qaıratkeri Nıkolaı Sıvchınskıı salǵan sýret buryn-sońdy esh jerde jarııalanbaǵan jáne onyń ózine tán erekshe tarıhy bar.
Maýsymasharda qonaqtarǵa shaǵyn mýzykalyq tartý jasalyp, merekeli kesh Ahmet Jubanov-Latıf Hamıdıdiń «Abaı» operasyn tamashalaýmen támamdaldy. Dástúrge saı jańa maýsymnyń ekinshi kúninde P.Chaıkovskııdiń «Aqqý kóli» baleti kórermenine jol tartty.
ALMATY
