Kollaj: egemen.kz
«Birneshe kúnnen keıin ótetin jalpyulttyq referendýmda halqymyz Qazaqstanda atom elektr stansııasyn salý qajet pe, álde qajet emes pe degen máseleni sheshedi. Daýys berý nátıjesi qandaı bolsa da, bul – aıtýly ýaqıǵa. Aldaǵy referendým – Qazaqstanda sońǵy bes jylda bolǵan aýqymdy ózgeristerdiń taǵy bir mysaly, «Halyq únine qulaq asatyn memleket» tujyrymdamasynyń jarqyn kórinisi. AES qurylysyna qatysty óz ustanymymdy buǵan deıin birneshe ret aıttym. Álemdegi progresten shet qalmaý úshin biz básekelestikte óz artyqshylyqtarymyzdy paıdalanýymyz kerek. Azamattar qoldap daýys bergen jaǵdaıda, bul Táýelsiz Qazaqstannyń búkil tarıhyndaǵy eń iri jobaǵa aınalady», dedi el Prezıdenti.
Memleket basshysy atap ótkendeı, atom elektr stansııasyn salý – uzaqmerzimdi joba. Alaıda bul bastama elimizdiń ornyqty damýyn onjyldyqtarǵa ilgeriletedi, energetıkalyq derbestigimizdi nyǵaıtady, ekonomıkanyń, ǵylym men bilimniń túrli salasyn órkendetýge tyń serpin beredi, sondaı-aq ınjenerler shoǵyry men ártúrli beıindegi mamandar legin qalyptastyrýǵa yqpal etedi.
«Zamannyń talaby osy. Demek, onyń paıdasyn qazirgi jastarymyz ben bolashaq urpaq kóredi. Osy rette AES qurylysyna qoldaý bildirip jatqan Halyqtyq shtabtyń jumysyn erekshe atap ótkim keledi. Shtab saıası partııalar men túrli qoǵamdyq uıymdardyń ókilderin, sondaı-aq ǵalymdardy, sarapshylardy, óndiris mamandary men kásipkerlerdi biriktirdi. Azamattardyń uıysyp, ortaq iske jumyla kirise alatynyn kórsetedi. Damýǵa umtylys – ultymyzdyń eń jaqsy qasıetteriniń biri. Sondyqtan biz eshqandaı qıyndyqqa qaramastan, alǵa qaraı batyl qadam basýymyz kerek. Taǵy da qaıtalaımyn. Aldaǵy referendým táýelsizdik jyldaryndaǵy eń mańyzdy ýaqıǵa bolady jáne elimizdiń odan ári damýyna tikeleı áser etedi», dep túsindirdi Memleket basshysy.
Sondaı-aq forým barysynda Qasym-Jomart Toqaev elimizdiń bolashaǵy jastardyń qolynda ekenin alǵa tartty.
«Otandastarymyzǵa aıtarym: demokratııa – úzdiksiz júretin úderis. Oǵan turaqty túrde atsalysý qajet. Osyny qaperden shyǵarmaýymyz kerek. Álemdegi kez kelgen tabysty demokratııalyq qoǵam aınalasyna beı-jaı qaramaıtyn azamattardyń arqasynda ǵana damıdy, ómirsheń bolady. Ár azamattyń ál-aýqaty men Otanymyzdyń taǵdyry tek ózimizdiń qolymyzda. Balalarymyz ben nemerelerimiz bizdiń jetistikterimizdi eseleýi úshin keler urpaqqa qajetti jaǵdaı jasaý – ortaq paryzymyz. Qazaqstannyń bolashaǵy – jastardyń qolynda. Men bul týraly únemi aıtyp júrmin. Jerimizge egilgen ár taldyń ıgiligin kóretin de – jas urpaq. Bir sózben, ne istesek te, bárin elimizdiń erteńi úshin isteımiz. Sondyqtan biz balalardyń densaýlyǵyna, olardyń bilimi men tárbıesine búkil el bolyp erekshe kóńil bólýimiz kerek. Memleket osy baǵytta naqty sharalar qabyldady, ıaǵnı qarajat bólip, qajetti ınfraqurylym salýda. Jalpy, bul jumys qarqyndy júrip jatyr deýge bolady, biraq, aldymyzda turǵan mindetter aýqymdy, áli de atqaratyn sharýa kóp», dep qosty Qazaqstan Prezıdeni.
