Mýzeı maıtalmandarynyń mereıi

Ulttyq mýzeıdiń 10 jyldyq mereıtoıy men «Kúmis jas» jobasy aıasynda mýzeı isi ardagerleriniń qatysýymen Qarttar kúnine arnalǵan «Qarttarym – asyl qazynam» atty saltanatty is-shara ótti. Oǵan «Qamqor otbasy», «Shańyraq» qarttar úıleri, «Belsendi uzaq ómir súrý» ortalyqtarynan zeınet jasyndaǵy qarııalar qatysty.

Mereke qarsańynda tusaýy kesilip otyrǵan «Kúmis jas» jobasy elimizdiń tarıhı-mádenı murasyn nasıhattap, zeınetkerlerge jan-jaqty qoldaý kórsetý, bos ýaqyttaryn paıdaly, tıimdi ótkizýge, qyzyqty sharalar uıymdastyrýǵa baǵyttalyp otyr.

Ulttyq mýzeıdiń ǵylymı hatshysy Saıalbek Ǵızzatov qonaqtardy tól merekesimen quttyqtap, «Kúmis jas» jobasyn aǵa býyn men jas urpaq arasyndaǵy altyn kópir deı kele, ıgi bastamaǵa sáttilik tiledi.

– Búgingi aıtýly is-sharamen qa­tar Ulttyq mýzeıge 10 jyl toldy. Basqosýdyń taǵy bir sebebi, «Kúmis jas» jańa jobasy­nyń tusaýkeserine kýá bolyp otyr­myz. Irgeli jobanyń basty maq­saty, ózimizdiń zeınetke shyqqan ardager­lerimizge, olardyń basyn qosyp salamat­ty ómir saltyn ustanýǵa, mý­zeı­diń shyǵarmashylyq áleýetin odan ári damytýǵa atsalysý ekenin aıta ketken jón. Joba aǵa býyn men jas urpaqtyń arasyndaǵy altyn kópir ispettes bolǵaly tur. Ataqty fran­sýz jazýshysy Andre Morýa «Batyldyq, erkindik ólgende, qarttyq dúnıege keledi» degen eken. Sizder batyl, erkin basyp júre berińizder, jas urpaq sońdaryńyzdan ere bersin», – dedi ol.

Munan soń is-sharaǵa kelgen qur­metti qonaq, mýzeı maıtalmany Sa­han Asaıynqyzy sóz sóılep, mýzeı qyz­metkerleriniń syı-qurmetine alǵysyn bildirdi.

– On jyl buryn osy mýzeıdiń shańyraǵyn kóteremiz dep bárimiz atsalysqan bolatynbyz. Sol jyldardan beri ulttyq biregeı shańyraq jandanyp, jańa belesterge qol jetkizdi. Mýzeı salasynda 1967 jyldan beri eńbek ettim. Elimizdiń tarıhı muralaryn, jádigerlerin tanytý, olardy zertteý – úlken, qomaqty shar­ýa. Osy jolda eńbektenip júr­gen árbir qyzmetkerge tek tabys tileı­min,– dedi Sahan Asaıynqyzy.

Merekelik dastarqan basynda vıktorınalyq oıyndar oınatylyp, Qazaqstannyń eńbek sińirgen ártisi Bekbolat Baısaǵatov pen mýzeı qyzmetkerleri qonaqtarǵa óner kórsetip, syılyq tabys etti.